Rusia dërgon një gjeneral për mision ushtarak në Venezuelë, në kulmin e tensioneve me SHBA

Rusia ka dërguar një gjeneral të lartë në Venezuelë për të drejtuar një mision këshillimor ushtarak, raporton “The War Zone” duke cituar kreun e inteligjencës ushtarake të Ukrainës.

Sipas deklaratave të bërë për “The War Zone” nga Shefi i Drejtorisë së Inteligjencës së Mbrojtjes së Ukrainës (GUR), Kyrylo Budanov, në Venezuelë po qëndron Kolonel Gjeneral Oleg Leontievich Makarevich, i cili komandon Task Forcën “Equator” të Ministrisë së Mbrojtjes së Rusisë.

Ai drejton mbi 120 trupa ruse të angazhuara në trajnimin e forcave venezueliane në një gamë të gjerë aftësish ushtarake.

Budanov theksoi se ky angazhim nuk është përgjigje ndaj pranisë së shtuar të forcave amerikane në Karaibe, por pjesë e një rotacioni afatgjatë që ka vijuar prej vitesh.

Sipas tij, misioni rus përfshin këshillim dhe trajnime në fushat e këmbësorisë, dronëve, forcave speciale dhe inteligjencës së sinjalit.

Budanov shtoi se Makarevich dhe rreth 90 oficerë rusë ndodhen në Caracas, ndërsa pjesa tjetër e trupave janë vendosur në Maracaibo, La Guaira dhe Aves Island.

Ai theksoi se prania ruse pritet të vazhdojë edhe në rast të një goditjeje amerikane kundër regjimit të Nicolas Maduro, duke sugjeruar se Moska do të përpiqet të ushtrojë presion diplomatik nëse situata tensionohet.