Sekretari i Luftës i SHBA-së që kritikoi pamjen e ushtarëve, por ç’fshihet nën kostumin e tij

Përpara një numri të madh zyrtarësh të lartë ushtarakë dhe Presidentit Donald Trump, Sekretari i Luftës i SHBA-së Pete Hegseth kritikoi obezitetin e gjeneralëve në Quantico dhe atë që ai e quajti “mbeturina toksike ideologjike”.

Hegseth e përfundoi prezantimin e tij me mesazhin se gjithçka përfundon me një “luftë kundër luftëtarëve” dhe se ushtria duhet të punojë për disiplinën, pamjen dhe gjendjen fizike.

Kur bëhet fjalë për pamjen fizike, Hegseth e sheh problemin te mjekrat, flokët e gjatë dhe politikat gjinore.

Por jo shumë kohë pas fjalimit të tij, në internet filluan të qarkullonin foto të tatuazheve të tij, simbolika e të cilave shoqërohet me Kryqëzatat, ikonat militante, si dhe me patriotizmin ekstrem amerikan.

Në gjoks ai mban një simbol që vishej nga ushtarët gjatë Kryqëzatave, dhe përdorej edhe si stemë e shtetit feudal në Lindjen e Mesme të asaj kohe, “Mbretërisë së Jerusalemit”.

Ai gjithashtu mban mbishkrimin “Deus Vult” në krah, i cili është një slogan kryqëzate që përkthehet si “Zoti dëshiron” dhe u krijua gjatë Kryqëzatës së Parë.

Ka edhe detaje interesante si një gjarpër me një shtizë dhe një mburojë me një shpatë dhe një mbishkrim në latinisht “Ne desit virtus” që do të thotë “Le të mos dështojë virtyti”.

Një tjetër tatuazh që ka tërhequr shumë vëmendjen e publikut është fjala “kafir” e shkruar me shkrim arab, që përkthehet si “i pafe”.

Shumë e konsiderojnë këtë si ofenduese për myslimanët, veçanërisht kur merret në kontekstin e ikonografisë së Kryqëzatave që ky ministër mban me krenari dhe kritikon të tjerët për atë që ai e quan “mbeturina toksike ideologjike”.

Ai është tallur gjithashtu nga shumë njerëz për “leksionin” e tij mbi pamjen dhe disiplinën, ndërkohë që ai vetë duket joprofesional sepse mban tatuazhe që simbolizojnë një nga fushatat ushtarake më të përgjakshme në histori.