SHBA REVOKON MBI 300 MIJË VIZA, RITMI I ANULIMEVE PËRSHPEJTOHET

Administrata e presidentit Donald Trump ka revokuar më shumë se 300 mijë viza amerikane gjatë mandatit të tij të dytë, njoftoi Departamenti i Shtetit, ndërsa qeveria vazhdon shtrëngimin e politikave të emigracionit.

Shifra tregon një përshpejtim të ndjeshëm të anulimeve. Më 10 gusht, Departamenti i Shtetit kishte raportuar mbi 175 mijë viza të revokuara që nga fillimi i mandatit të Trumpit në janar 2025.

Zëdhënësi Tommy Pigott deklaroi se administrata aktuale ka revokuar më shumë viza dhe me ritëm më të shpejtë se çdo administratë tjetër në historinë amerikane. Sipas tij, masat synojnë shtetasit e huaj që shkelin ligjin, kryejnë mashtrime ose cenojnë sigurinë kombëtare.

Njoftimi nuk përmban ndarje sipas shtetësisë, llojit të vizës ose arsyes konkrete të anulimit. Për këtë arsye, nga bilanci i publikuar nuk mund të përcaktohet numri i shtetasve shqiptarë apo i qytetarëve nga Kosova që mund të jenë prekur.

Organizatat për mbrojtjen e të drejtave civile kanë kundërshtuar disa prej revokimeve, veçanërisht ato që lidhen me protestues të huaj propalestinezë dhe me postime në rrjetet sociale. Ato pretendojnë se masat mund të cenojnë të drejtën për proces të rregullt dhe lirinë e shprehjes.

Administrata Trump ka zgjeruar njëkohësisht kontrollin e aktivitetit në rrjetet sociale të emigrantëve dhe aplikantëve për viza, si dhe ka vendosur tarifa më të larta për disa kategori vizash pune.