Shqipëria i bashkohet Fondacionit të Aleatëve të Izraelit

Shqipëria është bërë kombi i 64-të që i bashkohet Fondacionit të Aleatëve të Izraelit dhe Tirana është gati të prezantojë Grupin e Aleatëve të Izraelit në Parlament të hënën, raporton Jerusalem Post.

Grupi i ri parlamentar do të punojë krah për krah me koalicionin ndërkombëtar të grupeve parlamentare pro-Izraelit për të çuar përpara “diplomacinë e bazuar në besim”, duke forcuar njëkohësisht mbështetjen për Izraelin.

“Është një nder i madh të jem pjesë e këtij momenti, duke shënuar një kapitull tjetër në miqësinë dhe bashkëpunimin e gjatë midis Shqipërisë dhe Izraelit. Fakti që ky grup përfshin përfaqësues si nga shumica ashtu edhe nga opozita mbart një kuptim të fortë simbolik, duke reflektuar angazhimin tonë të përbashkët kombëtar dhe marrëdhëniet e shkëlqyera midis dy popujve tanë”, tha Romina Kuko.

“Është një nder të shënojmë një kapitull të ri në miqësinë e qëndrueshme midis Shqipërisë dhe Izraelit. Kjo iniciativë pasqyron vlerat tona të përbashkëta dhe lidhjet e thella historike. Shpëtimi i hebrenjve nga Shqipëria gjatë Luftës së Dytë Botërore mbetet një simbol krenar i humanitetit dhe guximit tonë. Përmes kësaj platforme, ne forcojmë partneritetin tonë në promovimin e paqes, bashkëjetesës dhe dinjitetit njerëzor”, theksoi Gazment Bardhi.

Anëtarët pjesëmarrës të Parlamentit pritet të nënshkruajnë Rezolutën zyrtare për Grupin Parlamentar të Aleatëve të Izraelit gjatë ceremonisë së hapjes së së hënës.

“Shqipëria ka një trashëgimi të jashtëzakonshme të mbrojtjes dhe nderimit të popullit hebre, dhe ky grup i ri do të ndërtohet mbi atë traditë morale”, tha Josh Reinstein, president i Fondacionit të Aleatëve të Izraelit.

“Diplomacia e bazuar në besim vazhdon të bashkojë udhëheqësit rreth vlerave të përbashkëta biblike. Jemi krenarë që e mirëpresim Shqipërinë në rrjetin tonë global në një moment kur qëndrimi përkrah Izraelit është më i rëndësishëm se kurrë”.

Nga AP