Shumë zhurmë në Tiranë/ Zaloshnja: Dilni në zgjedhje, përballuni me Ramën te kutia e votimit

Pas 94 ditësh protestë në bulevardet e Tiranës, lëvizja qytetare ende nuk ka prodhuar një rezultat konkret politik. Ka pasur ulje-ngritje në pjesëmarrje dhe shumë zhurmë në rrjetet sociale, por ende mungon një strukturë drejtuese e gjithëpranuar dhe një objektiv politik i realizuar.

Sipas Eduard Zaloshnjës, pikërisht gara e ardhshme për Bashkinë e Tiranës mund të jetë testi real i forcës së protestës.

Ndërsa PS-ja dhe opozita përgatiten të nxjerrin kandidatët e tyre, organizatorët e protestës kanë përpara një mundësi: të nxjerrin një kandidat të tyrin dhe të provojnë në kutitë e votimit se sa mbështetje reale kanë në kryeqytet.

Shifrat e zgjedhjeve të vitit 2023, sipas Zaloshnjës, tregojnë se hapësira ekziston.

Rreth 165 mijë tiranas votuan kandidatin e mbështetur nga Rama, rreth 105 mijë kandidatin e mbështetur nga Berisha, ndërsa rreth 32 mijë votuan kandidatë të tjerë. Në të njëjtën kohë, rreth 200 mijë zgjedhës nuk morën pjesë fare në votime.

Pra, argumenton Zaloshnja, një pjesë e konsiderueshme e elektoratit të Tiranës nuk u rreshtua pas dy kampeve kryesore.

Tani protesta ka përballë testin e vërtetë: a mund ta kthejë “gumëzhimën internetore” në vota?

Nëse organizatorët besojnë se kanë mbështetje reale në kryeqytet, gara për Bashkinë e Tiranës do të ishte mundësia ideale për ta provuar.

Në fund, kutia e votimit do të japë përgjigjen që rrjetet sociale nuk mund ta japin: sa “këllqe elektorale” ka realisht protesta e bulevardit.

E PLOTE