Siguria e Kosovës po rrezikohet nga Serbia? Shefi i KFOR-it shton numrin e ushtrisë

Komandanti i KFOR-it, gjeneralmajor Ozkan Ulutash, është takuar me përfaqësues të Listës Serbe, në një kohë kur kjo parti ka shprehur kundërshtime ndaj tërheqjes graduale të pranisë së misionit të NATO-s nga ura kryesore mbi lumin Ibër në Mitrovicë.

Gjatë takimit është diskutuar situata e sigurisë në veri të Kosovës dhe procesi i riorganizimit të trupave të KFOR-it në këtë pjesë të vendit.

Sipas KFOR-it, ndryshimet në vendosjen e trupave lidhen me përmirësimin e situatës së sigurisë, ndërsa procesi do të zhvillohet në mënyrë graduale dhe do të përshtatet me zhvillimet në terren. Komandanti i misionit ka theksuar se trupat mund të rikthehen ose të shtohen nëse situata e ardhshme paraqet rrezik për sigurinë në Kosovë apo stabilitetin rajonal.

KFOR ka deklaruar gjithashtu se, edhe pas përfundimit të procesit të riorganizimit, do të ruajë një prani të konsiderueshme në Mitrovicën e Veriut dhe në pjesën veriore të Kosovës. Misioni ka bërë të ditur se mbetet i gatshëm të përshtatë praninë e tij në varësi të zhvillimeve të sigurisë.

Lista Serbe ka kundërshtuar ndryshimet në praninë e KFOR-it pranë urës mbi Ibër, duke e konsideruar praninë e misionit një faktor stabiliteti. Përfaqësuesit e kësaj partie kanë argumentuar se çdo ndryshim në masat e sigurisë duhet të bëhet me kujdes, duke marrë parasysh tensionet e mëparshme në veri.

Ura kryesore mbi lumin Ibër lidh Mitrovicën e Jugut me Mitrovicën e Veriut dhe ka qenë nën mbikëqyrjen e KFOR-it që prej përfundimit të luftës në vitin 1999. Aktualisht, ura lejon kalimin e këmbësorëve.

Takimi mes drejtuesve të KFOR-it dhe Listës Serbe vjen në kuadër të diskutimeve mbi situatën e sigurisë dhe ndryshimet në dislokimin e forcave të misionit në veri të Kosovës.