Telefonata që ndryshon fatin e luftës/ Putin i jep garanci Trumpit, reagon Kremlini

Një telefonatë rreth një orëshe mes Donald Trump dhe Vladimir Putin ka rikthyer në vëmendje përpjekjet diplomatike për t’i dhënë fund luftës në Ukrainë.

Sipas Kremlinit, biseda mes dy presidentëve ishte “konstruktive dhe e sinqertë”.

Putin i ka paraqitur Trumpit vlerësimin e Moskës për situatën në front, ndërsa i ka shpjeguar se çfarë mund të bëjë Washingtoni për t’i dhënë fund sa më shpejt luftimeve.

Një prej deklaratave më të rëndësishme të Kremlinit lidhet me Evropën.

Sipas këshilltarit të Putinit, Juri Ushakov, presidenti rus i ka garantuar Trumpit se Rusia nuk ka “plane agresive” ndaj vendeve evropiane.

Në fokus të bisedës kanë qenë edhe takimet e fundit të të dërguarve amerikanë Steve Witkoff dhe Jared Kushner në Moskë dhe Kiev. Palët i kanë vlerësuar pozitivisht këto kontakte, por deri tani nuk është njoftuar ndonjë marrëveshje konkrete për përfundimin e luftës.

Trump ka shprehur dëshirën për një përfundim të shpejtë të konfliktit, duke argumentuar se një marrëveshje paqeje do të hapte rrugën edhe për rikthimin e marrëdhënieve ekonomike dhe tregtare mes Shteteve të Bashkuara dhe Rusisë.

Ndërkohë, presidenti ukrainas Volodymyr Zelenski ka deklaruar se propozimet e paraqitura nga pala amerikane janë “të mira dhe me vlerë”, por çështjet kryesore të konfliktit mbeten ende të pazgjidhura.

Në terren, luftimet vijojnë. Ukraina po kërkon forcimin e mbrojtjes ajrore, ndërsa vendet evropiane kanë rritur mbështetjen ushtarake për Kievin.

Putin dhe Trump kanë rënë dakord të mbajnë të hapura kanalet e komunikimit dhe të zhvillojnë kontakte të tjera nëse do të jetë e nevojshme.
Megjithatë, pavarësisht intensifikimit të diplomacisë, një marrëveshje përfundimtare për t’i dhënë fund luftës ende nuk është arritur.