Trump bisedë telefonike me Netanyahun: Trupat izraelite nuk do të sulmojnë Bejrutin

Presidenti i Shteteve të Bashkuara, Donald Trump, deklaroi se ka zhvilluar një bisedë telefonike “shumë produktive” me kryeministrin izraelit Benjamin Netanyahu, gjatë së cilës ka marrë garanci se ushtria izraelite nuk do të ndërmarrë një operacion tokësor në Bejrut dhe se njësitë që ishin në lëvizje drejt kryeqytetit libanez janë urdhëruar të tërhiqen.

Në një postim në platformën Truth Social, Trump tha se ndërhyrja e tij diplomatike ka ndihmuar në shmangien e një përshkallëzimi të mëtejshëm të konfliktit në Liban, në një moment kur tensionet mes Izraelit dhe lëvizjes shiite Hezbollah kishin arritur nivele alarmante. Sipas presidentit amerikan, përmes përfaqësuesve të nivelit të lartë është zhvilluar komunikim edhe me Hezbollahun, i cili ka pranuar të ndalojë të gjitha sulmet ndaj Izraelit.

“Israeli nuk do t’i sulmojë ata dhe ata nuk do ta sulmojnë Izraelin”, shkroi Trump, duke e paraqitur marrëveshjen si një hap të rëndësishëm drejt uljes së tensioneve në rajon.

Deklarata e Trump vjen pas një dite të mbushur me zhvillime dramatike. Më herët, qeveria izraelite kishte paralajmëruar sulme ndaj periferive jugore të Bejrutit, zona që konsiderohen bastione të Hezbollahut, ndërsa mijëra banorë kishin nisur evakuimin nga frika e bombardimeve. Në të njëjtën kohë, Hezbollahu kishte intensifikuar sulmet me raketa drejt veriut të Izraelit, duke rritur frikën për një konflikt më të gjerë rajonal.

Sipas burimeve diplomatike libaneze, përfaqësues të afërt me Hezbollahun i kishin përcjellë Uashingtonit gatishmërinë e grupit për një armëpushim të plotë, me kusht që Izraeli të ndalte sulmet ndaj Bejrutit dhe zonave përreth. Kjo duket se ka krijuar terrenin për ndërhyrjen e Trump dhe kontaktet e tij me të dyja palët.

Megjithatë, mbetet e paqartë nëse marrëveshja e shpallur nga presidenti amerikan do të zbatohet plotësisht në terren. Raporte të para pas njoftimit sugjeruan se incidente sporadike dhe shkëmbime zjarri vazhduan edhe pas deklaratës së Trump, duke ngritur pikëpyetje mbi qëndrueshmërinë e armëpushimit.

Nëse marrëveshja respektohet nga të dyja palët, ajo mund të përfaqësojë një kthesë të rëndësishme në përpjekjet për të shmangur zgjerimin e luftës në Liban dhe për të ulur tensionet në Lindjen e Mesme, një rajon që prej muajsh po përballet me përshkallëzim të vazhdueshëm të konflikteve.