TRUMP I JEP “BEKIMIN” PAKTIT/ Arabia, Turqia dhe Pakistani krijojnë aleancën e re të mbrojtjes

Presidenti amerikan Donald Trump ka mirëpritur marrëveshjen e re të përbashkët të mbrojtjes mes Arabisë Saudite, Turqisë dhe Pakistanit, duke e cilësuar atë një hap të madh dhe të rëndësishëm për sigurinë e Lindjes së Mesme.

Marrëveshja, e nënshkruar më 7 gusht, parashikon që një sulm i armatosur ndaj njërit prej tre vendeve të konsiderohet si sulm ndaj të gjithëve. Pakti synon forcimin e bashkëpunimit ushtarak, shkëmbimin e inteligjencës, industrinë e mbrojtjes, stërvitjet e përbashkëta dhe koordinimin e kapaciteteve ushtarake.

Trump deklaroi se është “shumë i lumtur” për marrëveshjen, duke e paraqitur atë si shenjë të afrimit mes vendeve të rajonit dhe të një përpjekjeje për të rritur aftësinë e tyre për vetëmbrojtje.

Pakti është përshkruar si një mekanizëm mbrojtjeje kolektive, me disa ngjashmëri me parimin e nenit 5 të NATO-s, por zyrtarët e vendeve pjesëmarrëse theksojnë se ai është mbrojtës dhe jo ofensiv, si dhe se nuk synon një shtet të caktuar.

Ndërkohë, Turqia ka shprehur interes për zgjerimin e aleancës. Egjipti është përmendur si një vend që mund t’i bashkohet në një fazë të ardhshme, megjithëse zgjerimi do të kërkonte dakordësim mes vendeve themeluese.

Marrëveshja parashikon gjithashtu krijimin e një sekretariati të përhershëm në Arabinë Saudite dhe një strukturë të përbashkët politike e ushtarake për koordinimin e vendimeve.

Në një kohë tensionesh të larta në Lindjen e Mesme, krijimi i këtij mekanizmi të ri të sigurisë po shihet si një zhvillim me potencial për të ndryshuar ekuilibrat strategjikë të rajonit.