Tucker Carlson: Feja e vërtetë e Donald Trump është “izraelizmi”, jo krishterimi

Feja e vërtetë e Presidentit të SHBA-së, Donald Trump, është “izraelizmi” dhe jo krishterimi, ka pohuar gazetari dhe podkasteri konservator Tucker Carlson, duke kritikuar politikat e presidentit në Lindjen e Mesme.

Carlson i bëri këto komente në përgjigje të deklaratave kontraverse të Trumpit gjatë javës së kaluar, duke përfshirë sulmet e tij ndaj Papa Leo XIV dhe postimet që e përshkruanin veten si një figurë të ngjashme me Krishtin.

Të hënën, Trump e përshkroi Papën e lindur në SHBA si “të dobët” dhe “të tmerrshëm për politikën e jashtme” pasi Papa e quajti kërcënimin e Trump për të shkatërruar qytetërimin iranian “vërtet të papranueshëm” dhe tha se Jezusi “nuk i dëgjon lutjet e atyre që bëjnë luftë, por i hedh poshtë ato”.

Në emisionin e tij, Carlson argumentoi se SHBA-të kishin nisur luftën kundër Iranit “në emër të Izraelit” dhe “me nxitjen e Izraelit”.

“Cila është feja, sinqerisht, e Donald Trump? Nuk është krishterimi, qartë. Është izraelitizëm. Është mbrojtja e Izraelit”, tha Carlson, duke shtuar se mbështetja për shtetin hebraik është bërë një “fe qytetare” e qeverisë amerikane.

Ai i përshkroi postimet e Trump në mediat sociale si “ikonografi” dhe “përpjekje për të përcjellë një deklaratë rreth besimit”, e cila “në fakt nuk përputhet me një teologji”.

Trump ndau një imazh të gjeneruar nga inteligjenca artificiale të vetes si një figurë e veshur me rrobë që shëron një burrë të shtrirë në shtrat, i shoqëruar nga shqiponja, avionë luftarakë dhe anëtarë të shërbimit amerikan, me Statujën e Lirisë dhe flamurin amerikan në sfond. Më vonë ai e fshiu postimin, duke thënë se ishte keqinterpretuar nga media e “lajmeve të rreme” .

Carlson tha se veprimet e Trump përbënin një “tallje të Zotit nga një udhëheqës i përkohshëm” dhe vlerësoi ish-kongresmenen amerikane Marjorie Taylor Greene, e cila e etiketoi postimin “më shumë se blasfemi” dhe “një frymë Antikrishti”.

Zëvendëspresidenti i SHBA-së JD Vance, i cili është katolik, mbajti anën e Trump, duke argumentuar se është “shumë e rëndësishme që Papa të jetë i kujdesshëm kur flet për çështje teologjike”.

Disa zyrtarë të lartë amerikanë kanë përdorur figura fetare për të justifikuar luftën me Iranin, me Sekretarin e Mbrojtjes Pete Hegseth që i ka nxitur amerikanët të luten për fitoren “në emër të Jezu Krishtit”.