TURQIA SHTERPE NE LIGEN E KOMBEVE, SHKARKOHET MONTELLA – PASUESI

Vincenzo Montella duket se është në prag të largimit nga drejtimi i Kombëtares së Turqisë.

Sipas mediave turke, Federata Turke e Futbollit ka vendosur të ndërpresë bashkëpunimin me trajnerin italian, pas serisë së rezultateve negative të kombëtares. Gazeta “Milliyet” raporton se vendimi për shkarkimin e Montellës është marrë dhe pritet të formalizohet të premten.

Pozitat e italianit janë dobësuar ndjeshëm pas rezultateve të fundit, ku Turqia ka pësuar dy humbje ndaj Italisë në Ligën e Kombeve, ndërsa paraqitja në Kupën e Botës ka shtuar kritikat ndaj stafit teknik.

Një tjetër element që rëndon situatën është seria e fundit prej shtatë ndeshjesh. Turqia ka arritur vetëm një fitore, ndërsa ka pësuar gjashtë humbje, duke e bërë gjithnjë e më të vështirë vazhdimin e aventurës së Montellës.

Trajneri italian, i cili mori drejtimin e Turqisë në vitin 2023, ka drejtuar 40 ndeshje, me një bilanc prej 21 fitoresh, 14 humbjesh dhe pesë barazimesh.

Sipas raportimeve, Montella përfiton rreth 183 mijë euro në muaj. Në rast të ndërprerjes së kontratës, ai pritet të marrë një dëmshpërblim që korrespondon me pesë paga mujore.

Por ndërsa Federata duket se po përgatit fundin e bashkëpunimit me italianin, mediat turke kanë nisur të zbulojnë edhe emrat që mund ta zëvendësojnë.

Në krye të listës së kandidatëve është Arda Turan, ish-ylli i kombëtares turke dhe ish-futbollisti i Atletico Madrid e Barcelonës. Turan aktualisht drejton Shakhtar Donetsk dhe konsiderohet një prej alternativave kryesore për të marrë drejtimin e kombëtares.

Ndërkohë, presidenti i Federatës Turke të Futbollit, Ibrahim Haciosmaoglu, është vënë gjithashtu nën presion pas rezultateve të fundit. Megjithatë, sipas mediave turke, ai nuk ka ndërmend të japë dorëheqjen.

Nëse largimi i Montellës formalizohet, Federata do të duhet të nisë menjëherë një kapitull të ri në stolin e Turqisë, ndërsa emri i Arda Turanit mund të kthehet në qendër të vëmendjes.