Vrasja e pronarit të kampingut dhe punëtorit shqiptar, autori fshihet në Athinë

Hetimet për vrasjen e pronarit 68-vjeçar të kampingut dhe kujdestarit 62-vjeçar shqiptar po vazhdojnë intensivisht nga autoritetet greke. Policia dyshon se autori i dyshuar është larguar drejt Athinës, ndërsa kamerat e sigurisë kanë konfirmuar praninë e tij në kryeqytet.

Sipas informacioneve nga media lokale “Protothema”, pista kryesore e hetimit mbetet konflikti mbi testamentin e biznesmenit, i cili kishte lënë pjesën më të madhe të pasurisë nipit të tij dhe gjysmën e arës kujdestarit shqiptar.

Vrasja ndodhi të dielën e kaluar në kamping, ku autori, i mbuluar, sulmoi pronarin dhe kujdestarin me armë. Nipi i pronarit, i pranishëm gjatë ngjarjes, arriti të shpëtojë dhe është dëshmitari kryesor.

Autoritetet policore po bashkëpunojnë me Departamentin e Vrasjeve në Atikë për të identifikuar dhe arrestuar autorin. Përveç testamenteve të fundit, po shqyrtohet edhe një testament i mëparshëm, i hartuar një vit më parë, për të zbardhur motivet e ngjarjes.

Policia ka mbledhur dëshmi nga punonjës të zonës, të cilët raportuan lëvizjet e dyshuara të autorit përgjatë rrugëve rurale drejt Pyrgos, duke përshkruar karakteristikat fizike të tij dhe mundësinë që të jetë i ri ose i mitur.