Zbardhet dëshmia e Ermal Beqirit në Francë: Kam korruptuar shtetin, por askush nuk është në burg

Biznesmeni shqiptar Ermal Beqiri do të vijojë të qëndrojë në paraburgim në Francë, pasi gjykata në Amiens rrëzoi kërkesën e tij për lirim. Vendimi u shpall të premten, më 23 tetor, tri ditë pasi Dhoma e Hetimit kishte shqyrtuar kërkesën e biznesmenit për të dalë nga burgu.

Beqiri, i cili jeton në një pronë të njohur si Château d’Auteuil, në Berneuil-en-Bray të departamentit Oise, kundërshton ekstradimin drejt Shqipërisë, ku përballet me dyshimet e SPAK-ut për përfshirje në një skemë të dyshuar që lidhet me tenderat publikë në fushën e teknologjisë së informacionit.

Sipas hetimeve të SPAK-ut, Beqiri dyshohet të jetë një nga personat që kanë organizuar një rrjet për përfitimin e kontratave publike përmes shtrembërimit të konkurrencës dhe përdorimit të intimidimit. Këto janë dyshime të autoriteteve shqiptare, të cilat duhet të shqyrtohen nga organet kompetente.

Çështja e ekstradimit ishte shqyrtuar edhe në gusht, kur Dhoma e Hetimit kërkoi informacion shtesë përpara se të merrte një vendim. Pas përcjelljes së dokumenteve të tjera nga autoritetet shqiptare përmes kanaleve zyrtare, gjykata e trajtoi çështjen në themel gjatë seancës së 23 tetorit.

Gjatë paraqitjes para gjykatës franceze, Beqiri vuri në pikëpyetje besueshmërinë e sistemit të drejtësisë në Shqipëri dhe pretendoi se procedimi ndaj tij ka prapavijë politike.

“Nëse kam korruptuar dikë, atëherë është shteti. Por nga ajo anë, askush nuk është në burg. Ka gjithsesi një problem”, citohet të jetë shprehur biznesmeni në deklaratat e publikuara nga mediat franceze. Ai e cilësoi gjithashtu çështjen ndaj tij si “tërësisht politike”.

Në anën tjetër, Prokuroria e Përgjithshme pranë Gjykatës së Apelit në Amiens mbështeti kërkesën e autoriteteve shqiptare për ekstradimin e Beqirit. Përfaqësuesja e akuzës argumentoi se gjykata franceze duhet të shqyrtojë kërkesën konkrete dhe dokumentacionin e paraqitur, pa dhënë një vlerësim të përgjithshëm për sistemin gjyqësor shqiptar.

Gjatë seancës, prokuroria iu referua edhe hetimeve kundër korrupsionit në Shqipëri, duke i paraqitur ato si pjesë të një procesi të gjerë për pastrimin e sistemit.

Për momentin, Beqiri mbetet në paraburgim në Francë. Vendimi për refuzimin e lirimit nuk përbën në vetvete një vendim përfundimtar mbi ekstradimin, i cili mbetet për t’u trajtuar nga autoritetet gjyqësore franceze.