ZELENSKY: SHBA KËRKON BISEDIME TREPALËSHE ME RUSINË DHE UKRAINËN DERI NË FUND TË TETORIT

Një lëvizje e re diplomatike nga Uashingtoni mund të rikthejë në të njëjtën tryezë Shtetet e Bashkuara, Ukrainën dhe Rusinë.

Presidenti ukrainas Volodymyr Zelensky deklaroi  në Kiev se Shtetet e Bashkuara kanë propozuar zhvillimin e një takimi të ri trepalësh me Ukrainën dhe Rusinë, në nivel teknik, deri në fund të muajit tetor.

“Shtetet e Bashkuara janë aktualisht në kontakt me Ukrainën dhe Rusinë dhe propozojnë të zhvillojnë, në një formë ose në një tjetër, një takim në nivel teknik, në një format trepalësh, deri në fund të tetorit”, deklaroi Zelensky.

Sipas presidentit ukrainas, Kievi e ka konfirmuar gatishmërinë për të marrë pjesë në këtë proces. Ai tha se ka komunikuar me negociatorët amerikanë dhe se Ukraina është e gatshme të mbështesë këtë afat.

Ende nuk ka një datë dhe vend përfundimtar për takimin. Zelensky tha se Ukraina është e hapur që bisedimet të zhvillohen në Emiratet e Bashkuara Arabe ose në një shtet tjetër të propozuar nga pala amerikane.

Emiratet kanë qenë më herët një nga vendet ku janë zhvilluar kontakte dhe përpjekje diplomatike lidhur me luftën Rusi–Ukrainë.

Në këtë fazë, megjithatë, çështja kryesore mbetet reagimi i Moskës. Zelensky tha se tashmë “topi është në fushën e Rusisë”, duke nënkuptuar se Kievi e ka dhënë dakordësinë e tij për formatin dhe pret një përgjigje nga Kremlini.

Takimi i propozuar nuk është paraqitur si një samit mes liderëve. Bëhet fjalë për një takim në nivel teknik, ku përfaqësuesit do të diskutonin elemente konkrete të mundshme të një procesi negociues.

Raportimet e fundit kanë lidhur këtë format edhe me diskutimin e një armëpushimi të pjesshëm, veçanërisht për kufizimin e sulmeve ndaj infrastrukturës energjetike.

Kjo e vendos nismën në një moment veçanërisht të ndërlikuar të luftës. Në ditët e fundit, sulmet ruse ndaj infrastrukturës ukrainase janë intensifikuar, ndërsa Kievi ka paralajmëruar kundërpërgjigje ndaj objektivave energjetike dhe të industrisë ruse.