Komunistët shqiptarë në mbështetje të Palestinës, Arlind Qorri “numëron krimet” e Izraelit

Jo vetëm myslimanët si Abdylaqim Mehmeti janë në krah të Palestinës, pas sulmit terrorist të Hamasit, por edhe komunistët si Arlind Qorri. Ndërkohë që në media raportohet për llahtari, me prerje koke, përdhunime e krime të tmerrshme nga Hamasi, Arlind Qorri “numëron krimet” e Izraelit. “Të mbash të pushtuar një popull është krim. Të kërkosh zhdukjen e një shteti të njohur ndërkombëtarisht është krim. Të vrasësh qëllimisht civilë është krim. Të mos e çash kokën për vrasjen e civilëve në arritjen e objektivave politikë, është krim. Të marrësh peng fëmijë e pleq është krim. Të ushtrosh spastrim etnik është krim. Të kërcënosh vrasjen e pengjeve është krim. Të ndërtosh një regjim aparteidi është krim. Të konsiderosh çdo civil si ushtar pushtues është krim.  Të mbash një popull të tërë të izoluar në një rrip toke është krim. Të mbash në panik njerëzit se mos u bie raketa mbi supermarket është krim. T’u zaptosh njerëzve shtëpinë është krim. Të vrasësh fëmijën e zaptuesit është krim. Nga pikëpamja humanitare, konflikti midis Izraelit dhe palestinezëve është një zhytje gjithnjë e më e thellë, cinike e mizore në krim, ku secili i kryen sipas kapaciteteve, përllogaritjeve politike dhe arsyeve historike të veta. Po përtej çdo parimi humanitar, përtej çdo llogarie gjeopolitike, mbetet e vërteta historike e pakundërshtueshme: populli i Palestinës ka të drejtën të ndërtojë një shtet të pavarur në trojet e veta të njohura ndërkombëtarisht, në paqe dhe siguri reciproke me shtetin e Izraelit. Uroj që çdo faktor me peshë në atë kontekst të dalë sa më parë nga gropa thithëse e hakmarrjes dhe asgjësimit të Tjetrit, të lërë mënjanë llogaritë dritëshkurtra dhe të ngrihet në lartësinë e kohës për të nisur negociata serioze. Përndryshe, druaj se gjëma që po thellohet në atë copë toke do t’i vërë flakën mbarë botës”, shkruan ai.