Përmbytjet në Vlorë/ Nis shpërndarja e ndihmave për familjet e prekura

Dy ditë pas përmbytjeve në Vlorë që shkaktuan dëme të shumta materiale, situata në qytetin bregdetar po i rikthehet normalitetit.

Raportohet se ujërat në rrugë janë tërhequr totalisht, teksa tashmë ka nisur shpërndarje e ndihmave për familjet e përmbytura dhe pritet dhe vlerësim i dëmeve në banesa dhe biznese.

Kryetari i Bashkisë së Vlorës Ermal Dredha, deklaroi se gjatë 24 orëve pas përmbytjeve, të gjitha strukturat e Bashkisë së Vlorës, kanë punuar me përkushtim për t’u përballur me pasojat e reshjeve të dendura, duke përfshirë ekipet e pastrimit, shërbimet emergjente, si dhe mbështetjen nga Ministria e Mbrojtjes.

Dredha theksoi se në ditët në vijim, Bashkia së bashku me grupet e dedikuara, do të dalë në terren për të ndihmuar qytetarët dhe për t’u siguruar që ata marrin mbështetjen financiare të nevojshme, për të rikthyer normalitetin në jetët e tyre.