Pavarësisht se çfarë thotë Netanyahu, Trump kërkon përfshirjen e Turqisë në forcën e Gazës

Një zyrtar amerikan ka deklaruar për Axios se Shtetet e Bashkuara duan që Turqia të luajë rol në forcën ndërkombëtare që po planifikohet për Gazën – edhe pse Izraeli është kundër këtij angazhimi.

“Sipas nesh, turqit ishin shumë të dobishëm në arritjen e marrëveshjes për Gazën, dhe sulmet verbale të Netanyahut ndaj Ankarasë kanë qenë shumë kundërproduktive,” ka thënë zyrtari amerikan, i cili foli në kushte anonimiteti.

Kjo deklaratë vjen në një kohë tensionesh të larta mes Ankarasë dhe Tel Avivit, pasi Presidenti turk Recep Tayyip Erdogan e ka akuzuar Izraelin për “gjenocid” në Gaza dhe ka ngrirë të gjitha marrëdhëniet diplomatike.

Megjithatë, Washingtoni po e sheh Turqinë si një aktor të domosdoshëm në çdo mekanizëm pasluftës për stabilizimin e Rripit të Gazës – duke përfshirë një forcë shumëkombëshe që do të ndihmonte në ruajtjen e rendit dhe dërgimin e ndihmave humanitare.

Izraeli, nga ana tjetër, e ka kundërshtuar fuqishëm idenë e përfshirjes turke, duke e akuzuar Erdoganin për qëndrime “anti-izraelite” dhe për mbështetje ndaj Hamasit.