Lajm i mirë për shqiptarët/ Gjykata amerikane rrëzon bllokimin e vizave emigruese

Një gjykatë federale amerikane ka rrëzuar politikën e administratës Trump që kishte pezulluar lëshimin e vizave emigruese për shtetasit e 75 vendeve, mes tyre edhe Shqipëria.

Vendimi është marrë nga gjykatësja federale Jeannette Vargas në Manhattan, e cila vlerësoi se masa e ndërmarrë nga Departamenti Amerikan i Shtetit tejkalonte kompetencat ligjore të Sekretarit të Shtetit.

Politika kishte hyrë në fuqi më 21 janar 2026 dhe kishte pezulluar lëshimin e vizave emigruese për shtetasit e një liste të gjerë vendesh.

Në këtë listë përfshihej edhe Shqipëria, së bashku me vende të tjera të Ballkanit si Bosnja dhe Hercegovina, Kosova, Mali i Zi dhe Maqedonia e Veriut.

Administrata amerikane e kishte argumentuar masën me shqetësimin se aplikantët nga këto vende mund të kishin rrezik më të lartë për t’u bërë barrë për sistemin e ndihmës publike në SHBA.

Gjykata e konsideroi ndalimin e përgjithshëm të vizave bazuar te shtetësia në kundërshtim me kuadrin ligjor amerikan.

ÇFARË DO TË THOTË PËR SHQIPTARËT?

Vendimi prek vizat emigruese, pra kategoritë që lidhen me emigrimin e përhershëm në SHBA, përfshirë raste të bashkimit familjar apo kategori të tjera emigrimi.

Nuk bëhet fjalë për vizat turistike apo studentore, të cilat nuk ishin pjesë e këtij pezullimi.

Vendimi i gjykatës rrëzon bazën e politikës që kishte bllokuar lëshimin e këtyre vizave për shqiptarët.

Megjithatë, mbetet për t’u parë se si do të zbatohet konkretisht vendimi nga Departamenti Amerikan i Shtetit dhe nëse administrata do ta ankimojë atë.

Për mijëra familje dhe aplikantë nga vendet e prekura, vendimi përbën një zhvillim shumë të rëndësishëm pas muajsh pezullimi.