NASA zbulon ‘ferrin’ 2026/ Europa ‘shkrihet’ nga vala e të nxehtit, rekorde nga Londra në Paris e Romë

Temperaturat ekstreme kanë goditur njëra pas tjetrës vende të ndryshme të kontinentit, ndërsa termometri ka kaluar në disa zona edhe kufirin e 40 gradëve Celsius.

Sinjalet e para të një vere të pazakontë u shfaqën që në muajin maj. Temperaturat arritën nivele rekord, duke thyer rekorde të vendosura dekada më parë.

Por vala e parë e të nxehtit nuk ishte një episod i izoluar.

Nga maji deri në mesin e gushtit, Evropa Perëndimore u përball me pesë valë të njëpasnjëshme të të nxehtit, ndërsa periudhat ekstreme u shoqëruan jo vetëm me temperatura shumë të larta gjatë ditës, por edhe me net të nxehta, duke i dhënë pak mundësi trupit të rikuperohet.

Pamjet e publikuara nga NASA tregojnë përhapjen dhe intensifikimin e valëve të të nxehtit në Evropë nga 1 maji deri më 19 gusht. Në hartën e temperaturave, zonat me të kuqe të errët tregojnë rajonet ku temperaturat arritën ose kaluan 40 gradë Celsius.

Rekordet janë thyer në disa prej qyteteve kryesore të Evropës.

Në Londër, temperatura arriti në 35.1 gradë Celsius më 26 maj, duke thyer rekordin e mëparshëm për muajin maj me më shumë se dy gradë.

Në Bordo të Francës, rekordi i temperaturës u thye për tre ditë radhazi në qershor, ndërsa më 24 qershor termometri arriti në 42.5 gradë Celsius.

Edhe Sllovakia regjistroi rekorde të reja në gusht, si për temperaturat maksimale gjatë ditës, ashtu edhe për temperaturat minimale gjatë natës.

Dhe tabloja bëhet edhe më shqetësuese kur shihen të dhënat në një periudhë më të gjatë.

Sipas Copernicus, temperaturat e kombinuara të muajve qershor dhe korrik në Evropën Perëndimore ishin më të lartat e regjistruara ndonjëherë.

Një verë që nisi me rekorde në maj, vazhdoi me temperatura mbi 40 gradë në qershor dhe gusht dhe u shndërrua në një seri valësh të njëpasnjëshme të të nxehtit.

Evropa nuk po përballet më me një episod të vetëm ekstrem, por me një verë të karakterizuar nga përsëritja dhe zgjatja e temperaturave rekord.