Do hapet dera e Shtëpisë së Bardhë? Pas Sali berishës, rradhën e ka Rama, udheton drejt Shteteve të Bashkuara

Pas Sali Berishës, radhën për të marrë rrugën drejt Shteteve të Bashkuara e ka Edi Rama.

Dy kundërshtarët politikë të Tiranës duket se bashkohen të paktën në një pikë: udhëtimet e tyre përtej Atlantikut kanë diasporën në axhendë, por deri tani shumë më pak Uashingtonin zyrtar.

Kryeministri Edi Rama pritet të udhëtojë në Nju Jork për të marrë pjesë në punimet e Asamblesë së Përgjithshme të Kombeve të Bashkuara, që zhvillohen nga 22 deri më 28 shtator.

Këtë vit, Shqipëria do të përfaqësohet në OKB nga kryeministri dhe jo nga Presidenti Bajram Begaj. Sipas axhendës paraprake, Rama pritet të mbajë fjalën më 25 shtator.

Por pjesëmarrja në Asamblenë e Përgjithshme të OKB-së është pjesë e kalendarit rutinë diplomatik dhe, në vetvete, nuk përbën një vizitë dypalëshe të kryeministrit shqiptar në Shtetet e Bashkuara.

Deri tani, të paktën sipas axhendës së bërë publike, nuk rezulton të jetë njoftuar ndonjë takim i Edi Ramës me Presidentin Donald Trump apo me zyrtarë të tjerë të lartë të administratës amerikane.

Kjo vjen në një moment kur Trump ka hyrë në vitin e dytë të mandatit të tij në Shtëpinë e Bardhë, ndërsa Rama, sipas materialit, deri më tani nuk ka zhvilluar një vizitë zyrtare në SHBA ku të jetë pritur nga administrata amerikane.

Kështu, udhëtimi i radhës i Ramës në Amerikë mbetet i lidhur zyrtarisht me OKB-në dhe jo me një vizitë të konfirmuar në Uashington. Një mungesë që e bën edhe më të fortë kontrastin me pritshmëritë për kontakte të nivelit të lartë mes Tiranës dhe administratës Trump.