TENDERI 12 MILIONË EURO TRONDIT PRISHTINËN, PËRPARIM RAMA NËN HETIM

Kryetari i Prishtinës, Përparim Rama, është marrë në pyetje nga Prokuroria Speciale e Kosovës në cilësinë e të pandehurit, nën dyshimin për keqpërdorim të pozitës apo autoritetit zyrtar. Në qendër të hetimeve është projekti milionësh “Arkitekti i Kryeqytetit”, i cili prej kohësh ka shkaktuar polemika për mënyrën e realizimit dhe procedurat e prokurimit.

Intervistimi është zhvilluar këtë të premte, më 30 tetor, ndërsa Prokuroria Speciale ka konfirmuar zyrtarisht se ndaj Ramës po kryhen veprime hetimore lidhur me këtë çështje.

Projekti në fjalë lidhet me një tender të shpallur nga Komuna e Prishtinës në vitin 2022, me vlerë të parashikuar prej 12 milionë eurosh, për shërbime konsulence arkitekturore, urbanistike dhe infrastrukturore.

Kontrata është shoqëruar me akuza dhe dyshime për parregullsi në procedurat e përzgjedhjes së operatorëve ekonomikë. Organizata Demokraci Plus kishte kërkuar anulimin e saj, duke ngritur shqetësime për përbërjen e komisionit të vlerësimit dhe konflikt të mundshëm interesi.

Ndërkohë, përfaqësuesi i Lëvizjes Vetëvendosje, Gëzim Sveçla, ka pretenduar se Komuna e Prishtinës ka paguar mbi 1 milion euro vetëm për shërbime konsulence gjatë dy muajve të vitit 2023.

Pas intervistimit, Përparim Rama deklaroi se është i gatshëm të bashkëpunojë me organet e drejtësisë dhe këmbënguli se veprimtaria e tij ka qenë transparente.

Edhe avokati i tij, Artan Çerkini, shprehu gatishmërinë për të paraqitur sqarimet dhe dokumentacionin e nevojshëm për të dëshmuar ligjshmërinë e projektit.

Hetimet pritet të sqarojnë nëse procedurat e tenderit kanë cenuar ligjin dhe nëse ekziston përgjegjësi penale e zyrtarëve të përfshirë.

Deri tani nuk është raportuar ngritja e një aktakuze ndaj Përparim Ramës për këtë rast. Ai gëzon prezumimin e pafajësisë deri në një vendim gjyqësor të formës së prerë.