Dosja Vlora Hyseni rikthehet në Këshillin e Sigurisë/ SHISH nis auditimin e thelluar

Çështja e ish-drejtoreshës së SHISH, Vlora Hyseni, pritet të rikthehet në Këshillin e Sigurisë Kombëtare, pasi Shërbimi Informativ i Shtetit të përfundojë auditimin e thelluar për pasojat e mundshme në funksionimin e institucionit.

Kryetari i Komisionit parlamentar të Sigurisë, Bledi Çuçi, deklaroi se Këshilli i Sigurisë Kombëtare u mblodh të hënën me kërkesë të Presidentit, ku SHISH paraqiti një informacion paraprak mbi situatën. Sipas Çuçit, në mbledhje u kërkua kryerja sa më shpejt e një auditimi të plotë për të verifikuar nëse zhvillimet e fundit kanë sjellë pasoja në veprimtarinë e institucionit.

Çuçi bëri të ditur se, pas përfundimit të auditimit, Këshilli i Sigurisë Kombëtare pritet të mblidhet sërish për të diskutuar më gjerësisht çështjen dhe informacionin e mbledhur nga SHISH.

Kreu i Komisionit të Sigurisë theksoi gjithashtu se procesi hetimor ndaj ish-drejtoreshës së SHISH duhet të vijojë nga Prokuroria, duke kërkuar që institucionet politike të presin përfundimin e hetimeve përpara se të ndërmarrin hapa të tjerë. Sipas tij, Kuvendi ka mekanizmat e veta të kontrollit dhe mund të kërkojë raportime nga institucionet e sigurisë pasi të jenë sqaruar elementët kryesorë të çështjes.

Çështja pritet të kalojë paralelisht edhe në Kuvend. Çuçi konfirmoi se Partia Demokratike ka paraqitur një kërkesë për mocion, e cila pritet të shqyrtohet në mbledhjen e Kryetarëve.

Në këtë fazë, sipas deklarimeve të Çuçit, mbeten për t’u përcaktuar pas përfundimit të hetimeve dhe auditimit përgjegjësitë e mundshme penale apo administrative të personave të përfshirë