Hamasi i përkushtuar, izraeli po shkel marrëveshjen/ Erdogan: Trump të bëj presion, ndryshe…

Presidenti i Turqisë, Recep Tayyip Erdoğan, ka deklaruar se vendi i tij është i gatshëm të ofrojë çdo formë mbështetjeje për popullin e Gazës, ndërsa u bëri thirrje Shteteve të Bashkuara dhe vendeve të tjera që të bëjnë më shumë për të ndaluar shkeljet e armëpushimit nga Izraeli.

Gjatë një deklarate për gazetarët, në kthim nga turi rajonal në Gjirin Persik, Erdoğan tha se ndërsa pala e Hamasit po respekton marrëveshjen, Izraeli po vazhdon ta shkelë atë.

“Si Turqi, po bëjmë maksimumin që armëpushimi të zbatohet. Pala e Hamasit po tregon përkushtim të plotë, ndërsa Izraeli po vazhdon shkeljet”, tha presidenti turk, sipas një transkripti të shpërndarë nga zyra e tij.

Ai shtoi se bashkësia ndërkombëtare, veçanërisht SHBA-të, duhet të ndërmarrin hapa konkretë për ta detyruar Izraelin të respektojë marrëveshjen.

“Izraeli duhet të mbahet përgjegjës përmes sanksioneve dhe ndalimit të shitjeve të armëve”, u shpreh Erdoğan.

Turqia, një nga kritikët më të ashpër të ofensivës izraelite në Gaza, është përfshirë së fundmi më aktivisht në përpjekjet ndërmjetësuese, pas takimit të muajit të kaluar midis Erdoğan-it dhe presidentit amerikan Donald Trump në Shtëpinë e Bardhë.

Ankaraja ka shprehur gatishmërinë për t’u bërë pjesë e një “forumi mbikëqyrës” për zbatimin e armëpushimit dhe rindërtimin e Gazës, duke ofruar kontribut si me forca ushtarake, ashtu edhe me kapacitete civile.

Megjithatë, kryeministri izraelit Benjamin Netanyahu ka sinjalizuar kundërshtimin e tij ndaj çdo roli të mundshëm të forcave turke në territorin e Gazës.

Duke iu përgjigjur këtyre qëndrimeve, Erdoğan shmangu kritikat e drejtpërdrejta, duke theksuar se “bisedimet për forumin e zbatimit të armëpushimit janë ende në zhvillim” dhe se “Turqia është e gatshme të ofrojë çdo formë mbështetjeje për popullin e Gazës”.