Momenti kur forcat amerikane shkatërrojnë një kullë kontrolli detar iranian pranë Hormuzit

Pamjet tregojnë kullën duke u shënjestruar dhe më pas duke u shkatërruar nga sulmi. Në rrjetet sociale po qarkullojnë edhe video të filmuara nga qytetarë, të cilat tregojnë momentin e goditjes nga një kënd tjetër.

Sekretari amerikan i Mbrojtjes, Pete Hegseth, publikoi në platformën X një fotografi nga momenti i sulmit, të shoqëruar me mesazhin: “Irani nuk kontrollon Ngushticën e Hormuzit.”

Sipas një deklarate të CENTCOM, më 16 korrik forcat amerikane shkatërruan kullën e mbikëqyrjes në portin Chah Bahar Shahid Kalantari, pjesë e një rrjeti mbikëqyrjeje detare që, sipas SHBA-së, është përdorur prej dekadash nga Korpusi i Gardës Revolucionare Islamike (IRGC) për të monitoruar dhe shënjestruar anijet tregtare që kalojnë në Ngushticën e Hormuzit.

Sipas ushtrisë amerikane, shkatërrimi i objektit dobëson aftësinë e IRGC-së për të koordinuar sulme ndaj anijeve tregtare dhe synon të garantojë lirinë e lundrimit në rajon.

Ky operacion u zhvillua në kuadër të valës së gjashtë të sulmeve amerikane ndaj objektivave iraniane, të cilat, sipas autoriteteve amerikane, kanë në shënjestër kryesisht infrastrukturën në jug dhe jugperëndim të Iranit.