Kërkohet ndërhyrja e fuqishme të SHBA-së në dialog

Doktori i marrëdhënieve ndërkombëtare, Gurakuç Kuçi, në një prononcim ka thënë se Serbia me veprimet e saj ndaj Kosovës, po hedh poshtë marrëveshjen e Ohrit.

“Qëndrimi i vendosur i Serbisë përputhet me veprime vendimtare në terren, duke demonstruar refuzimin e saj. Ata pohojnë me guxim kundërshtimin e tyre ndaj integrimit të Kosovës në OKB dhe bëjnë fushatë aktive kundër anëtarësimit të Kosovës në Këshillin për Evropën. Deklaratat e tyre të fundit tregojnë se ata e shohin marrëveshjen e Ohrit thjesht si një kornizë konceptuale, duke hedhur poshtë përmbajtjen e saj” – shprehet Kuçi, sipas te cilit dialogu mes Kosovës dhe Serbisë po shkon drejt dështimit, në rast se nuk ndërhyn SHBA dhe BE.

“Pa një angazhim të fortë nga SHBA-ja dhe BE-ja për ta mbajtur Serbinë përgjegjëse, situata vetëm do të përkeqësohet, veçanërisht pasi Perëndimi tërhoqi kërkesën e tij që Serbia të vendoste sanksione ndaj Rusisë. Në mungesë të një presioni të tillë, Serbia do të vazhdojë të përdorë taktika destabilizuese në Ballkanin Perëndimor, duke përfshirë edhe mjetet jopaqësore”, thekson Gurakuç Kuçi