Deputeti i VMRO-DPMNE: Ne duruam dhe fituam, besoj fort se edhe ju do të fitoni

“Mirëdita. Të nderuar kryetarë, të nderuar anëtarë të Asamblesë Kombëtare të Partisë Demokratike, të dashur miq.
Në emër të kryeministrit të Maqedonisë së Veriut, Hristijan Mickoski, dhe në emër të VMRO-DPMNE, ju përcjell përshëndetje të sinqerta dhe urime për Asamblenë Kombëtare të Partisë Demokratike të Shqipërisë. Të dashur miq të qendrës së djathtë shqiptare, është nder për mua të jem në Tiranë, në zemër të një vendi i cili ka vazhduar dhe vazhdon të luftojë për lirinë, për demokracinë dhe për vendin që i takon në familjen evropiane. Ju përcjell urimet e Maqedonisë së Veriut, të cilat vijnë nga bindja e thellë se e ardhmja e vendeve të Ballkanit Perëndimor do të shkruhet së bashku nga ato parti të cilat besojnë në të njëjtin sistem vlerash: liri, përgjegjësi, traditë, familje dhe qytetërim evropian.

Të dashur miq, e djathta e qendrës e shekullit të 21-të nuk mund të jetë e njëjtë me atë të shekullit të 20-të. Bota ka ndryshuar, teknologjia ka ndryshuar, votuesit kanë ndryshuar. Dhe ato parti të cilat refuzojnë të modernizohen zhduken; ato që modernizohen, por humbasin shpirtin, gjithashtu zhduken. VMRO-DPMNE ka qenë në këtë rrugë: u ripërtëritëm dhe u modernizuam pa humbur shpirtin, historinë dhe identitetin. Dhe rezultati është i qartë: sot ne jemi në qeveri, drejtojmë vendin dhe po e ndryshojmë atë. Për këtë arsye, kur shoh se çfarë po bën Partia Demokratike, modernizim, digjitalizim, organizim të diasporës, shoh të njëjtën rrugë, rrugën e suksesit dhe të fitores.

Miqësia midis Maqedonisë së Veriut dhe Shqipërisë nuk është një klishe diplomatike, por një realitet historik dhe gjeografik. Ne jetojmë krah për krah; qytetarët tanë janë të ndërlidhur me njëri-tjetrin përmes familjeve, kulturës dhe ekonomisë. Çfarë është e mirë për vendin tuaj, është e mirë edhe për vendin tim, dhe anasjelltas. Por më lejoni ta them qartë: e ardhmja e Ballkanit Perëndimor nuk mund të mbetet në sallën e pritjes së Bashkimit Evropian. Anëtarësimi në BE është e drejta jonë e fituar nëpërmjet viteve reformash, sakrificash dhe pritjeje. Ballkani Perëndimor është Evropë. Detyra e të djathtës së qendrës në rajonin tonë është të realizojë hyrjen në BE, jo si lypsarë, por si partnerë të barabartë.

Ne nuk duhet të jemi naivë. Kemi sfida të përbashkëta. E majta në rajonin tonë, në Tiranë, në Shkup dhe në të gjithë Ballkanin Perëndimor, ka nisur nga drejtësia sociale dhe ka përfunduar në korrupsion, kapje institucionesh, manipulim zgjedhjesh dhe dobësim të medias së lirë. Ka krijuar një sistem abuzimi, dhe ky sistem duhet të rrëzohet. Demokratët e Shqipërisë e dinë çfarë do të thotë të jesh në opozitë nën presion.

Partia jonë e di çfarë do të thotë të jesh në opozitë nën presion. Por ne duruam dhe fituam. Dhe besoj fort se edhe ju do të fitoni. E vërteta, modernizimi dhe fitorja janë ato që vijnë më pas. Kjo është formula. Partia jonë mbështet Partinë Demokratike jo vetëm sot në këtë ceremoni, por çdo ditë, në çdo përpjekje dhe në çdo tavolinë evropiane ku vendoset e ardhmja jonë e përbashkët. Edhe një herë, në emër të partisë, të kryetarit të saj dhe të kryeministrit, ju uroj suksese dhe mbi të gjitha, fitore,” tha Dragan Kovaçki, Deputeti i Parlamentit të Maqedonisë së Veriut./