LUFTA ME IRANIN/ SHBA GODET ISHULLIN STRATEGJIK

Ushtria amerikane ka kryer sulme ajrore kundër objektivave iraniane në ishullin Qeshm, në Ngushticën e Hormuzit. Operacioni u zhvillua të hënën, një ditë përpara zgjedhjeve të mesmandatit në Shtetet e Bashkuara, ndërsa autoritetet iraniane raportuan disa shpërthime në ishull.

Zyrtarë amerikanë, të cilët folën në kushte anonimiteti, i përshkruan goditjet si veprime mbrojtëse në përgjigje të përdorimit të raketave tokë-ajër nga forcat iraniane kundër mjeteve ushtarake amerikane. Megjithatë, nuk ka ende informacion të qartë se cilat objektiva amerikane ishin vënë në shënjestër.

Ishulli Qeshm ndodhet në një prej pikave më të rëndësishme të Ngushticës së Hormuzit, përmes së cilës kalojnë transportet detare të energjisë. Që nga nisja e luftës në fund të shkurtit, pas sulmeve amerikane dhe izraelite kundër Iranit, Teherani ka përdorur forcën ushtarake për të kufizuar lëvizjen e anijeve në këtë korridor.

Sulmet e fundit vijnë gjithashtu pas deklaratës së presidentit Donald Trump më 8 tetor, kur ai kishte përjashtuar ndërmarrjen e një sulmi amerikan kundër Iranit përpara zgjedhjeve të 3 nëntorit.

Përplasjet ushtarake në Hormuz kanë vazhduar edhe gjatë muajve të fundit.

Më 8 shtator, Komanda Qendrore Amerikane njoftoi shkatërrimin e pesë anijeve iraniane që transportonin naftë bruto. Sipas ushtrisë amerikane, operacioni pasoi dy sulme me raketa balistike që Garda Revolucionare Islamike kishte ndërmarrë kundër një anijeje luftarake amerikane gjatë dy ditëve të mëparshme.

Përpara këtij zhvillimi, forcat amerikane kishin ndërprerë operacionet sulmuese për rreth një muaj, nga fundi i korrikut deri në fund të gushtit. Më pas, ato rifilluan goditjet ndaj instalimeve ushtarake iraniane pranë Ngushticës së Hormuzit.