58 milionë euro pasuri të sekuestruara/ Britania: Pronat po përdoren për pastrimin e parave në Shqipëri

Një njoftim zyrtar i qeverisë britanike ngre një alarm të fortë për përdorimin e sektorit të pasurive të paluajtshme në Shqipëri për pastrimin e të ardhurave kriminale.

Më 26 gusht 2026, Ambasada Britanike në Tiranë publikoi marrëveshjen e parë të këtij lloji në Ballkanin Perëndimor mes Mbretërisë së Bashkuar dhe Shqipërisë për ndarjen e pasurive të rikuperuara nga krimi.

Por brenda njoftimit ndodhet një shifër që kërkon vëmendje shumë më të madhe.

Sipas qeverisë britanike, vetëm gjatë tremujorit të parë të vitit 2025, vlera e pasurive të sekuestruara dhe konfiskuara në Shqipëri ka kaluar 58 milionë euro.

Në këtë bilanc përfshihen mbi 1,000 sekuestrime dhe konfiskime të pasurive të paluajtshme.

Dhe Londra shkon më tej.

Në njoftimin zyrtar thuhet se këto të dhëna pasqyrojnë shkallën në të cilën sektori i pasurive të paluajtshme po keqpërdoret për pastrimin e të ardhurave kriminale.

Ky është një formulim me peshë, sepse nuk vjen nga një raportim mediatik apo nga një akuzë politike, por nga një komunikim zyrtar i qeverisë britanike mbi bashkëpunimin kundër krimit të organizuar dhe financave të paligjshme.

Britania evidenton se rrjetet e krimit të organizuar vijojnë të përdorin paratë cash, sistemet informale të transferimit dhe kriptomonedhat për të lëvizur dhe pastruar të ardhurat kriminale.

Në këtë panoramë, pasuritë e paluajtshme shfaqen si një nga sektorët që autoritetet britanike e konsiderojnë të ekspozuar ndaj parave të krimit.

MARRËVESHJA E PARË NË BALLKANIN PERËNDIMOR

Shqipëria dhe Mbretëria e Bashkuar kanë finalizuar ndërkohë një marrëveshje për ndarjen e pasurive të rikuperuara nga një çështje penale e përfunduar në Britani.

Çështja lidhej me konspiracion për furnizimin me kanabis të grupeve të krimit të organizuar në Angli dhe Uells.

Pas bashkëpunimit mes autoriteteve shqiptare dhe britanike, pasuri që konsideroheshin produkte të krimit u identifikuan dhe u rikuperuan në Shqipëri.

Marrëveshja fillestare përfshin rreth 54 mijë paund pasuri të rikuperuara, të cilat do të ndahen në mënyrë të barabartë mes qeverisë britanike dhe Agjencisë shqiptare të Administrimit të Pasurive të Sekuestruara dhe të Konfiskuara.

Marrëveshja u iniciua në Tiranë më 13 korrik 2026 dhe u finalizua me nënshkrimin në Mbretërinë e Bashkuar më 6 gusht 2026.

Por përtej 54 mijë paundëve, pyetja shumë më e madhe që hap dokumenti britanik është tjetër:

Ku janë mbi 1,000 pasuritë e paluajtshme të sekuestruara ose konfiskuara dhe çfarë historish fshihen pas tyre?

Sa prej tyre janë apartamente?

Sa janë vila, troje, ndërtesa apo prona turistike?

Në cilat qytete është përqendruar pasuria?

Dhe mbi të gjitha: nga cilat dosje penale burojnë këto miliona euro?

Duhet bërë edhe një dallim i rëndësishëm: shifra prej 58 milionë eurosh përfaqëson vlerën totale të pasurive të sekuestruara dhe konfiskuara të raportuara për atë periudhë. Njoftimi britanik nuk thotë se çdo njëra prej mbi 1,000 pronave është individualisht e provuar si produkt krimi, ndaj këto kategori nuk duhen barazuar automatikisht.

Por sinjali institucional është i qartë.

Kur vetë qeveria britanike deklaron se të dhënat tregojnë shkallën në të cilën real estate në Shqipëri po përdoret për pastrimin e të ardhurave kriminale, atëherë tregu i pronave nuk është vetëm histori ndërtimesh dhe çmimesh.

Është edhe histori e origjinës së parave.

Dhe aty fillon investigimi.