Presidencialet në SHBA – Donald Trump: Ndaloni votimin…po bëhet grabitje e madhe

Donald Trump nuk i ka ndalur akuzat për vjedhje votash. Në fjalën që mbajti në Shtëpinë e Bardhë kur dhe shpalli fitoren para se të numëroheshin votat, Trump bëri thirrje që të mbylleshin të gjitha votimet.

Ai e cilësoi procesin e votimit të turpshëm, teksa shtoi se gjithçka do të shkojë në Gjykatën e Lartë.

“Ishte një natë e shkëlqyer. Kemi fituar shtetet e rëndësishme. Çfarë ndodhi me këto zgjedhje. E di çfarë ndodhi? Ata e dinin se nuk mund të fitonin dhe thanë le të shkojmë në gjykatë. E kisha parashikuar unë këtë. E kisha ditur që nga dita që do të çonin në gjykatë. Florida ishte një fitore e jashtëzakonshme. Teksasi gjithashtu. Ohajo. Një ditë e shkëlqyer. Unë e dua shumë Ohajon. Rreth 500 mijë vota më shumë në karolinën e veriut. Pastaj gjithçka ndaloi dhe kjo është grabitje ndaj popullit amerikan. Është turp. Ne i kemi fituar këto zgjedhje.  Ne do sigurohemi për integritetin. Po bëhet një grabitje e madhe në kombin tonë. Ne duam që këto vota të përdoren në mënyrën e duhur. Ne do të shkojmë në Gjykatën e Lartë dhe duam që votimi të mbarojë. Nuk duam më vota të hedhura në 4 të mëngjesit,”- tha Trump