Pas zgjedhjeve…qameti

Nga Mero Baze

Për Partinë Demokratike, “viktimizimi” prej Berishës, si një arsye e fortë për të mos fituar kurrë, vlen më shumë se entuziazmi fals, që e paraqet Berishën si aset të fortë të fitores imagjinare të tyre. Kjo e dyta, përveçse nuk i shpëton nga humbja e thellë, do t’i shkatërrojë shumëfish pas zgjedhjeve, pasi rrit pritshmëritë pa qenë nevoja tek një pjesë e paqartë e elektoratit të tyre.

Duke pranuar Berishën si problem, PD del më pak e dëmtuar nga zgjedhjet, pasi nuk ka çfarë pret. Do të humbasë, por ama ka të drejtë të përcjellë Berishën në shtëpi e më pas të shikojë hallet e veta. Njerëzit janë më të qartë për arsyen e humbjes dhe akoma më të qartë për një të ardhme pa të.

Por çfarë po ndodh?

Berisha, që e ka kuptuar këtë rrezik, po lufton që të ngrejë një entuziazëm fals që shkakton të qeshura në shoqërinë shqiptare. Për shembull, Topalli thotë: “Rikthimi ka ndodhur”, domethënë Berisha ka fituar. Vazhdon Flamuri dhe cakton shifrën 60 për qind. Pastaj del Berisha dhe thotë se “do të më heqë Trumpi ‘non grata’-n”. E gjithë kjo estradë, me sytë e të gjithëve, ka vetëm një qëllim: të kenë mundësi të bëjnë sikur po luftojnë deri më 11 maj. Pastaj, arsyet e humbjes i ka gati prej 34 vitesh: “M’i vodhën, m’i blenë, m’i kërcënuan zgjedhësit”, etj.

Problemi është fiks që pas 11 majit të mos ndodhë ajo që duhet të ndodhë, që Berisha të marrë ndëshkimin dhe të ikë në shtëpi, por të vazhdojë të qëndrojë për të tërhequr zvarrë PD-në.

Shikoni me çfarë përpiqen të gënjejnë demokratët. “Kemi miratuar 3 rezoluta”, thonë në partitë e djathta. Jam shumë i habitur pse nuk kanë miratuar 6, për shembull, pasi miratimi i një rezolute brenda familjes politike është rutinë për çdo hallexhi. Kur kërkon një rezolutë, thjesht tregon se ke një hall që s’ta zgjidh dot njeri, por mund të ankohesh brenda familjes.

Vënë dhe gazetarë t’i paraqesin këto si maja suksesesh dhe dështime të Edi Ramës. Merre me mend të kishin këta aksesin ndërkombëtar të Edi Ramës. Këta, me rezoluta që i shkruajnë vetë, i lexojnë vetë dhe i shpërndajnë vetë, shpallin sukses ndërkombëtar. Dhe flasin për një familje politike që njeh ende Lulzim Bashën si faktor në PD, i cili realisht nuk është, por vetëm për shkak të Berishës, të cilit s’i zënë dot as emrin në gojë.

Pra, me rezoluta false, me deklarata entuziazmi fals dhe, mbi të gjitha, me strategji pa rrugëdalje për krizën e tyre, ata duan të shkojnë drejt 11 majit duke gënjyer demokratët që gjithë punët i kanë në rregull, por “seç ka ndodhur gjatë rrugës” dhe kanë marrë 25 për qind. Pastaj, pas zgjedhjeve, qameti. Dhe do fillojnë këngën nga e para, derisa të vdesë ose Berisha, ose PD.