“Farsa të marrë fund”/ Balla mesazh të fortë për Hagën para vendimit për Thaçin

Kryetari i grupit parlamentar të Partisë Socialiste, Taulant Balla, ka komentuar vendimin që pritet të shpallet më 16 shtator nga Dhomat e Specializuara të Kosovës në Hagë, në procesin gjyqësor ndaj ish-krerëve të Ushtrisë Çlirimtare të Kosovës.

Pas marshimit të zhvilluar në Prishtinë në mbështetje të Hashim Thaçit, Kadri Veselit, Rexhep Selimit dhe Jakup Krasniqit, Balla deklaroi se pret që vendimi i gjykatës të jetë pafajësia e plotë e katër të pandehurve.

“Populli i Kosovës foli qartë. Më 16 shtator drejtësia e vetme që mund të bëjë gjykata është pafajësia e plotë e katër komandantëve”, u shpreh Balla.

Ai e cilësoi procesin gjyqësor si një proces që, sipas tij, është zgjatur prej vitesh dhe pretendoi se Gjykata Speciale ka tejkaluar mandatin për të cilin është krijuar.

Balla foli gjithashtu për akuzat ndaj ish-krerëve të UÇK-së dhe ndikimin që, sipas tij, ato kanë pasur mbi perceptimin e luftës së zhvilluar në Kosovë. Ai iu referua edhe raportit të Dick Marty-t, duke shprehur qëndrimin se pretendimet e përfshira në të janë përdorur më pas në proceset ndaj ish-udhëheqësve të UÇK-së.

Duke folur për rëndësinë e çështjes, Balla bëri thirrje për unitet mes shqiptarëve, pavarësisht vendit ku jetojnë, ndërsa theksoi se vendimi i gjykatës duhet të vlerësohet në kuadër të procesit gjyqësor dhe provave të paraqitura gjatë tij.

Procesi ndaj Hashim Thaçit, Kadri Veselit, Rexhep Selimit dhe Jakup Krasniqit vijon në Dhomat e Specializuara të Kosovës në Hagë. Vendimi i gjykatës pritet të përcaktojë përgjegjësinë penale të të pandehurve lidhur me akuzat e ngritura ndaj tyre.