Trump nuk heq dorë, nxiton të blejë ishullin më të madh në botë/ Kryeministri atje: Nuk jemi në shitje

Grenlanda nuk është në shitje, tha sot lideri i atij ishulli, duke reaguar ndaj komenteve të presidentit të sapozgjedhur të SHBA-së, Donald Trump, për “pronësinë dhe kontrollin” e ishullit të madh Arktik që është pjesë e Danimarkës për më shumë se 600 vjet.

“Grenlanda është e jona. Ne nuk jemi në shitje dhe nuk do të jemi kurrë në shitje. Ne nuk duhet të humbasim luftën tonë të gjatë për liri”, tha kryeministri i ishullit Mute Egede në një koment me shkrim.

Trump njoftoi dje se kishte zgjedhur Ken Howery, një ish të dërguar në Suedi, si ambasador të tij në Kopenhagë dhe komentoi statusin e Grenlandës, një pjesë gjysmë autonome e Danimarkës dhe shtëpia e një baze të madhe të Forcave Ajrore të SHBA. “Për qëllimin e sigurisë kombëtare dhe lirisë në mbarë botën, Shtetet e Bashkuara të Amerikës e konsiderojnë pronësinë dhe kontrollin e Grenlandës si një domosdoshmëri absolute”, shkroi Trump në platformën “Truth Social”.

Trump, i cili merr detyrën më 20 janar, nuk dha detaje mbi deklaratën e tij. Qeveria daneze nuk ishte menjëherë e disponueshme për koment.

Groenlanda, me bazën e saj ajrore Pitufik, është strategjikisht e rëndësishme për sistemin e paralajmërimit të hershëm të raketave balistike dhe ushtarake amerikane, duke qenë se rruga më e shkurtër nga Evropa në Amerikën e Veriut kalon përmes ishullit.

Trump është përpjekur të blejë Grenlandën edhe më parë

Gjatë mandatit të tij të mëparshëm, Trump shprehu interes për të blerë Grenlandën në vitin 2019, por ky propozim u refuzua shpejt nga Danimarka dhe autoritetet e ishullit, përpara se të fillonin bisedimet zyrtare.

Kryeministrja daneze Mette Frederiksen e quajti më pas ofertën e Trump “absurde”, gjë që e shtyu atë ta quante refuzimin e saj të idesë “të pafytyrë” dhe të anulonte vizitën e tij në Kopenhagë. Frederiksen vazhdon të shërbejë si kryeministër danez.

Që nga viti 2009, Grenlanda ka të drejtë të shpallë pavarësinë nga Danimarka. Ishulli me rreth 56,000 banorë, i cili mbështetet çdo vit në transferta të konsiderueshme buxhetore nga Kopenhaga, deri më tani është përmbajtur nga një veprim i tillë.

Më vete, Trump kërcënoi dje se do të rivendoste kontrollin e SHBA-së mbi Kanalin e Panamasë , duke akuzuar Panamanë për tarifa të tepërta për përdorimin e kalimit të Amerikës Qendrore.