“Kodi i kuq”/ Turqia lëshon urdhër arresti ndërkombëtar për Netanyahun

Turqia ka nisur procedurat për kërkimin e arrestimit ndërkombëtar të kryeministrit izraelit Benjamin Netanyahu, në kuadër të një çështjeje penale që lidhet me akuzat për gjenocid në Gaza dhe një incident me aktivistët e Flotiljes Global Sumud.

Lajmi është bërë i ditur nga ministri turk i Drejtësisë, Akin Gurlek, i cili deklaroi se Ankaraja i ka kërkuar Interpolit lëshimin e një njoftimi të kuq për Netanyahun dhe shtetasin izraelit Afek Moskovitch. Kërkesa synon që dy personat të mund të kërkohen ndërkombëtarisht për arrestim.

Sipas autoriteteve turke, procedurat gjyqësore po zhvillohen në Gjykatën e 11-të të Lartë Penale në Stamboll. Çështja, e regjistruar me numrin 2026/108, përfshin 35 të pandehur, mes tyre Netanyahun dhe Moskovitchin.

Gurlek bëri të ditur se ndaj dy shtetasve izraelitë janë lëshuar urdhër-arreste që prej 14 korrikut. Më pas, Ministria turke e Drejtësisë i ka kërkuar Ministrisë së Brendshme nisjen e procedurave për kërkimin e një “njoftimi të kuq” nga Interpoli, ndërsa dokumentacioni i është përcjellë edhe Ministrisë së Jashtme turke.

Çështja lidhet me një incident me aktivistë që synonin të dërgonin ndihma humanitare në Rripin e Gazës. Sipas autoriteteve turke, aktivistët janë përballur me ndërhyrje në ujërat ndërkombëtare.

Ndërkohë, zhvillimet marrin një dimension të veçantë edhe për Shqipërinë. Tre anije të Flotiljes Global Sumud janë nisur nga Puglia drejt vendit tonë, me destinacion ishullin e Sazanit.

Sipas organizatorëve, aktivistët synojnë t’u bashkohen protestave kundër projektit për ndërtimin e një resorti në Sazan. Ata kanë deklaruar solidaritet me protestuesit shqiptarë dhe kundërshtimin e tyre ndaj zhvillimit të ishullit.

Në këtë mënyrë, çështja që ka nisur në Turqi merr edhe një dimension rajonal, ndërsa zhvillimet rreth Flotiljes Global Sumud pritet të ndiqen me vëmendje edhe në Shqipëri.