Hapet dera për të rinjtë? Lamallari: do të ndryshojmë kriteret për zjarrfikësit

Përvoja e të rinjve shqiptarë që shërbejnë si zjarrfikës në vendet e Bashkimit Europian pritet të përdoret në procesin e reformimit dhe modernizimit të shërbimit zjarrfikës në Shqipëri. Ministri i Punëve të Brendshme, Besfort Lamallari, zhvilloi një takim me profesionistë shqiptarë që prej vitesh punojnë në strukturat zjarrfikëse në Finlandë dhe Gjermani, si dhe me të rinj të interesuar për t’iu bashkuar këtij profesioni.

Në fokus të diskutimeve ishte rishikimi i kuadrit ligjor që rregullon shërbimin zjarrfikës, me synim forcimin e kapaciteteve dhe krijimin e një sistemi më efektiv në parandalimin dhe përballimin e zjarreve.

Lamallari deklaroi se puna për ndryshimin e bazës ligjore ka nisur dhe se procesi do të përfshijë edhe kriterin e moshës për pranimin në shërbimin zjarrfikës. Sipas tij, synimi është ndërtimi i një sistemi më efikas, parandalues dhe mbrojtës ndaj zjarreve.

Në takim u vlerësua veçanërisht përvoja e profesionistëve shqiptarë që ushtrojnë këtë detyrë në Finlandë dhe Gjermani. Njohuritë e tyre mbi mënyrën e organizimit dhe funksionimit të shërbimeve homologe në vendet e Bashkimit Europian pritet të shërbejnë si një pikë referimi për ndryshimet që mund të zbatohen edhe në Shqipëri.

Ministria e Punëve të Brendshme synon që bashkëpunimi me profesionistët shqiptarë jashtë vendit të shtrihet edhe në trajnime, shkëmbim eksperiencash dhe forcim të kontakteve me shërbimet zjarrfikëse europiane. Një tjetër fokus është përfshirja e të rinjve që dëshirojnë të ndërtojnë karrierë në këtë sektor.

Përvoja e diasporës shqiptare në strukturat zjarrfikëse të vendeve të BE-së konsiderohet një mundësi për të sjellë praktika dhe standarde të reja në shërbimin shqiptar, në kuadër të një procesi të paralajmëruar për rishikimin e kuadrit ligjor dhe rritjen e kapaciteteve profesionale.