Aktualitet

Fatos Lubonja: Të bashkohemi të gjithë me Berishën dhe Metën për të rrëzuar Ramën

Fatos Lubonja ka folur për garën e 14 majit duke u ndalur tek paraqitja e opozitës në këto zgjedhje. Në emisionin Open, Lubonja tha se kryeministri Rama ka bërë një “grusht gradual shteti nga lart” në vend.

Sipas tij forcat opozitare në vend duhet të rreshtohen së bashku dhe të bëjnë rezistencë kundrejt qeverisjes dhe më pas të kenë diskutime mes tyre. Ai shtoi se nuk fiton dot askush përballë një regjimi të tillë që ka kapur çdo institucion.

“Unë kam folur për bashkim dhe kam dhënë një shembull shumë të qartë. Atë që ka ndodhur në Izrael këto ditë. Është ende në proces akoma. Ndodhi kjo që Netanyahu donte të bënte një reformë në drejtësi ku donte të shtonte nja dy gjyqtarë në Gjykatën e Lartë, etj dhe nuk po u hyj teknikaliteteve dhe u kundërshtua nga kundërshtarët e tij, nga opozita, por jo vetëm. Duke iu referuar Hararit që kishte bërë edhe një shkrim për këtë, duke e quajtur “grusht shteti nga lart”.

Sipas tij ka dy lloje grushtesh shteti. Ka grusht shteti nga poshtë, kur gjeneralë të caktuar që duan të marrin pushtetin bëjnë sulm mbi pallatin dhe kapin e marrin pushtetin nga poshtë – lart. Ka dhe një grusht shteti nga lart -poshtë kur qeveritarë në pushtet me qeveri legjitime dhe sipas ligjit, fillojnë të përdorin ligjin duke përjetësuar pushtetin e tyre.

Teza ime është që Edi Rama ka bërë pikërisht këtë. Një “grusht gradual shteti nga lart”. Nuk po i hyj me detaje sepse kam folur dhe herë të tjera dhe e kam quajtur herë “putinizëm”, herë e kam quajtur “tirani e mazhorancës”, apo “narkoshtet”. Kam përdorur terma të ndryshëm.

Tani çfarë ndodhi në Izrael. U bashkuan të gjithë dhe dolën në shesh. Jo vetëm opozita, por edhe Presidenti i Republikës, por edhe shoqëria civile, por edhe sindikatat që shkuan deri në grevë të përgjithshme për ta ndaluar. Pra ishte një bashkim për të mbrojtur themelet e shtetit që është demokracia dhe liria, terreni mbi të cilin jetojmë të gjithë të qetë. Kur ky terren është i kërcënuar atëherë unë them që duhet ky bashkim.

Nëse ka Shqipëria një shembull të tillë, unë e kam një, ku kam qenë dhe vetë kur ndodhi ‘96-‘97 dhe kur Berisha po bëhej një rrezik sipas mendimit të një shumice, ndodhi edhe ajo kriza e piramidave, u bashkuan nga e djathta ekstreme me Petrit Kalakulën deri tek Partia Socialiste. U bashkuan për të normalizuar këtë dhe për të shkuar në zgjedhje dhe jo për të marrë aty pushtetin njëra ose tjetra.

Unë tani flas për bashkim. Tani e kanë gjetur kollaj këta polemizuesit dhe thonë: “Është rreshtuar me Berishën”. Unë nuk them “të rreshtohemi me Berishën” siç e ka përdorur Kajsiu: “Rreshtohet Lubonja me Berishën”. Absolutisht nuk e kam thënë ndonjëherë. Unë kam thënë bashkim, hajde të gjejmë modalitetet.

Sigurisht edhe me Berishën, edhe me Metën, por modalitetet duhen diskutuar. Çfarë diskutoj unë për ata që i quaj “të baraslarguarit”. Këta nisen në apriori që “me Berishën dhe me Metën nuk duhet të bashkohesh se këta nuk janë zgjidhje”. Së dyti, nuk përcaktojnë të gjithë lirinë dhe demokracinë si rrezik kryesor. Thonë është sistemi, madje sistemi në kuptimin e përgjithshëm. Por edhe ai që kishim ne me 3 parti, ai sistemi që unë i kam quajtur “banda” ishte më demokratik se ky që kemi sot dhe që po eliminon gjithçka.

Ai ishte një sistem ku mund të dilnin parti të reja. Në këtë situatë tani, ku ka një sistem për t’i eliminuar kundërshtarët, nuk ka asnjë shans që të lindin parti të reja. Dhe dalin teza se “e keqja është njësoj”, se “është Rama, por është dhe Berisha”. Kjo është teza e të baraslarguarve, që ata janë njësoj. Ka dhe teza të tjera që nuk vënë lirinë dhe demokracinë si rrezikun kryesor, por korrupsionin etj.

Atëherë çfarë bën kjo. Kjo e shpërqendron vëmendjen e publikut nga ai që është rreziku kryesor. Madje Endri Shabani tha herën e kaluar se “ne do rregullojmë transportin urban”. Një pjesë nga këta nuk e quan as regjim, nga këta të baraslarguarit. Duket sikur jemi vend normal, në një vend që vetëm se është Berisha dhe Meta të pabesueshëm për shkak të së kaluarës së tyre (dhe këtu ka për të folur sa të duash), nuk fiton opozita, se përndryshe mund të fitojë.

Teza ime është që nuk fiton dot kushdo qoftë kur janë kapur të gjitha institucionet. Atëherë duhen bashkuar të gjitha forcat. Unë u kam bërë thirrje të gjithëve nëpërmjet shembullit izraelit. Edhe socialistëve, sepse në Izrael ishte edhe ministri i mbrojtjes dhe 2 ministra të tjerë iu larguan nga qeveria Netanjahut për këtë gjë. U bëj thirrje edhe socialistëve që të bashkohen në këtë front.

Në vend të kësaj, bëhet sikur jemi në një sistem të korruptuar si ai i viteve 2015-2017 në qeverisjen e parë të Ramës kur ai ishte me Metën dhe kishte ende shpresë se mund të kishte rotacion. Atëherë mbështesnim parti të reja. Vetë unë kam mbështetur Bojaxhiun, kam mbështetur dhe Ben Blushin me këtë tezë që duhet të dalë diçka e re.

Përvoja më mëson që kjo tezë është e dështuar. Në ’97-ën u bashkuan të gjithë për një çështje të caktuar dhe pastaj u shkua në zgjedhje. Termat e bashkimit nuk mund t’i diskutoj tani, por unë them që duhet bashkim. Tezat nuk i kam formuluar, por teza kryesore është që “jo të rreshtohesh me Berishën”, por me identitetet e tyre këto forca të reja që janë kundër regjimit duhet të shkojnë në këtë front dhe nesër të bëjnë debat me Berishën, t’i vënë kushte Berishës.

Këta as nuk mendojnë të shkojnë tek Berisha sepse të baraslarguarit thonë që edhe Berisha është njësoj dhe duhet përjashtuar nga politika. Ky është problemi” – tha Lubonja.

Aktualitet

Anila Hoxha: Grupet kriminale ofruan 1 milion euro për “kokën” e Durim Bamit

Anila Hoxha e ftuar në “Breaking” ka treguar intrigat dhe prerjet në besë mes të fortëve të grupeve kriminale.

Ajo tregon se anëtarë të grupeve kriminale kanë ofruar 1 milion euro për kokën e Durim Bamit dhe se mjaft hapur kanë kërkuar kërkuar vrasës me pagesë edhe nga Kosova dhe Maqedonia e Veriut.

Anila Hoxha: Hetimet do të fokusohen tek hetimi pasuror jo vetëm të individëve që i përkasin botës së krimit, por gjithashtu edhe ndaj ish-zyrtarëve të policisë, mes tyre edhe ish-drejtori i Policisë së Lezhës, i cili do të ketë një hetim të detajuar pasuror dhe do të ketë të njëjtin fat të hetimeve pasurore me shumë mundësi edhe sekuestrove sa më shpejt edhe ish-zyrtari i policisë, ish-drejtori i Forcave Operacionale Oltion Bistri, i dorëzuar pak ditë më parë nën akuzë para gjykatësit paraprak me disa persona të tjerë, midis tyre edhe Pëllumb Gjoka.

E sigurt është që për Ervis Martinaj teksa vijon të jetë i mbuluar me mister fati i tij prej dy vitesh, tani më është në fuqi një mandat i tretë arresti dhe bëhet fjalë edhe për dosjen më të fundit të konsideruar si një nga sukseset hetimore, pavarësisht se shumica e tyre nuk janë arrestuar ende.

Është një sukses sepse hedh dritë mbi mënyrën mbi skemën sesi krimi i organizuar vepron dhe shkëmben favore midis njëri-tjetrit për të eliminuar kundërshtarët. Shtrirja e aktivitetit të këtyre grupeve me aleanca kaq të forta për vrasje, ajo që është provuar, të paktën jo vetëm nga aplikacionet që ata kanë përdorur, por edhe nga dosjet e tërhequra vërtetojnë se grupi dhe anëtarët, pra 50 persona, shumica e tyre po ndërvepronin për të eliminuar kundërshtarët për ngjarjet që kanë ndodhur dhe që kanë dështuar më pas, pra nuk kanë ndodhur vrasjet, disa prej tyre midis viteve 2019-2021.

Shikohet një aleancë shumë e fortë në dosjet hetimore midis Arben Ndokës i cili ka qenë deputet i parlamentit dhe këmbëngulja e tij për të eliminuar kundërshtarin dhe atë që konsideron si armikun Durim Bamin për të cilin anëtarët e tjerë të grupeve kriminale diskutojnë se ata janë gati të paguajnë mbi 1 milion euro për ta realizuar ekzekutimin e tij.

Nga ana tjetër edhe përgatitjet e Durim Bamit por edhe Endrit Dokles gjithashtu të dy të kërkuar, janë shumë këmbëngulëse përsa i takon përpjekjeve për të eliminuar Arben Ndokën. Ata flasin hapur për gjetje vrasësish në Shqipëri, por arrihet deri në një pikë se ish-deputeti Arben Ndoka thotë se kishte dëgjuar për vrasës të cilët ishin më punëmbaruar sipas tij dhe e kishte fjalën për vrasës që mund të silleshin nga Kosova dhe nga Maqedonia e Veriut.

Aktualitet

Kosova si arenë e gladiatorëve, rivaliteti mes Britanisë së Madhe dhe Gjermanisë

“Në Kosovë, britanikët udhëhiqen nga politika e SHBA-së dhe ndjekin interesat amerikane në masën më të madhe”- keshtu ka vleresuar , gazetari serb Filip Rodiç, dhe se ekziston një rivalitet shekullor mes Britanisë dhe Gjermanisë, rivalitet i cili reflektohet edhe në fushën per Kosovën.

“Ajo që thuhet për Britaninë e Madhe, se në të vërtetë ka qene dhe eshte “aeroplanmbajtëse amerikane” ne 50 vitet e fundit, mendoj se është e vërtetë edhe kur bëhet fjalë për Kosovën” – deklaroi Rodiç duke shtuar: – “Hashim Thaçi ishte produkt i inteligjencës franceze, të cilin më pas e morën amerikanët kurse FARK-u i Ibrahim Rugovës ishte më shumë i lidhur me Gjermaninë. Dhe ka pasur nga ato raste të arrestimeve para pesë-gjashtë viteve të disa gjoja spiunëve gjermanë në Kosovë, gjë që tregon se ka një rivalitet të ndërsjellë mes tyre dhe britanikëve, se ata nuk janë tamam si dora dhe doreza në një shpirt”- theksoi Rodiç.

Sipas tij, fakti që Britania u largua nga BE tregon fuqinë e saj, jo të kundërtën.

“Pra, se ishte mjaftueshëm e fuqishme për të dalë nga BE-ja, dhe së dyti, se ishte mjaftueshëm e fuqishme për të ruajtur statusin e saj pas daljes nga Unioni. Ata po kërkojnë të ruajnë dhe forcojnë interesat e tyre në mbarë botën, përfshirë Kosovën” – theksoi gazetari serb.

Sipas tij, është e rëndësishme të theksohet se nuk ka një politikë të përbashkët monolite të BE-së ndaj Kosovës, edhe pse në praktikë tregohet se administrata e Brukselit është sponsor i pavarësisë së Kosovës.

Siç tha ai, jo vetëm pesë anëtarët e BE-së që nuk e njohin shkëputjen e Kosovës kanë qëndrim ndryshe nga të tjerët, por edhe disa vende si Hungaria që e njohin shkëputjen nuk e pranojnë saktësisht në të gjitha aspektet atë që kërkon Brukseli.

“Përsa i përket ndikimit të Britanisë së Madhe, mendoj se, si në shekujt e kaluar, bazohet kryesisht në punën e tyre të inteligjencës dhe në prapaskena. Ka një thënie që i atribuohet Mahatma Gandit, që thotë se aty kur sheh dy peshq në fund të oqeanit, ka një nëndetëse britanike, ndryshe nga gjermanët, për shembull, që duken shumë më të hapur dhe konkretë. Britania është ende anëtare e Këshillit të Sigurimit të OKB-së.

Ajo ka një ndikim shumë të madh në ish-kolonitë e saj, në vendet e Komonuelthit, nëse jo nga forca, të paktën nga paratë që ka në dispozicion, të cilat janë të mëdha dhe domethënëse”- theksoi Rodiç.

Kur është fjala për mbështetjen e Kosovës për anëtarësim në Këshillin e Evropës, ai theksoi se Gjermania dhe Franca “të cilat ishin avokatët më të zëshëm të idesë së anëtarësim të Kosovës në Këshillin e Evropës, me sa duket kanë hequr dorë së fundmi”.

“Sepse nga Gjermania, Franca, Italia është dëgjuar të thonë se Kosova nuk duhet të pranohet në KiE para se të plotësohen disa kushte, para së gjithash asociacioni, kurse Britania e Madhe shfaqet shumë komode si dikush që do të marrë flamurin e lobimit për anëtarësimin e Kosovës teksa janë në një front me SHBA-në”- potencoi Rodiç.

Aktualitet

Altin Dumani zbulon hetimin: Një biznes shqiptar tentoi t’i krijojë akses mafies ndërkombëtare në Shqipëri! Si u zbulua

Kreu i SPAK, Altin Dumani ka zbuluan skemën se si një biznes shqiptar tentoi t’i krijojë akses mafies ndërkombëtare në vendin tonë.

Drejtuesi i Prokurorisë së Posaçme deklaroi se biznesi tentoi t’i jepte akses mafies për të integruar të ardhurat në sektorin bankar për shtresëzimin e transfertave dhe më pas, tha Dumani, do të tranferoheshin po me ndihmën e biznesit vendas jashtë vendit.

Por kreu i SPAK deklaroi se u zbulua pas bashkëpunimit me bankat e nivelit të dytë duke bërë që ky operacion i grupeve kriminale të dështonte.

Dumani: Një nga skemat komplekse të pastrimit të parave në Shqipëri, përfshin përdorimin e bankave dhe bizneseve shqiptare si ndërmjetës për organizatat ndërkombëtare kriminale si mafia italiane,

Një rast një biznes shqiptar bashkëpunoi për ti dhënë akses përfaqësues të mafias ndërkombëtare të integronte të ardhurat kriminale në sektorin bankar për shtresëzimin e transfertave që pastaj do të tranferoheshin po me ndihmën e biznesit vendas jashtë vendit.

Bashkëpunimi shumë i mirë me bankat e nivelit të dytë, bëri që ky operacion i grupeve kriminale të dështonte.

Aktualitet

Do të ketë të penduar, Topalli për operacionin e SPAK: Informacione për fatin e Ervis Martinajt

“Do të ketë persona të penduar”, tha gazetarja e kronikës së zezë, Aida Topalli.

Gazetarja e Replika.al tha se mund të dalin informacione për fatin e Ervis Martinajt, pasi personat e arrestuar kanë pasur konflikt të drejtpërdrejtë me porositësit e vrasjeve.

Sakaq theksoi se ‘Martinaj dhe Duka në dosje kërkojnë të ulin gjakrat, edhe pse donin të vrisnin njëri-tjetrin’.

“Ka pasur tentativa të tjera të Martinajt për të sheshuar konflikte me armiq të tij, jo vetëm me Leonard Dukës. Martinaj dhe Duka në dosje kërkojnë të ulin gjakrat, edhe pse donin të vrisnin njëri-tjetrin.

Do të kemi një të penduar. Një ose edhe më shumë. Nëse do kemi atëherë do jenë mjaft të informuar. Porositësit e ngjarjeve kriminale kishin kontakte të drejtpërdrejtë me ta. Pse jo informacion edhe për fatin e Ervis Martinajt.

Gentjan Bejtja kishte dhe armiq të tjerë dhe çfarë bëjnë grupet kriminale? Në vitin 2022 që përkon me zhdukjen e Martinajt, unë kam shkruar një artikull ku thuhej se Ervis Martinaj u shit nga njerëzit e tij më të afërt. Na lind pikëpyetja ose është ende gjallë pasi organet e hetuesisë nuk kanë një përgjigje.”, tha ajo.

Aktualitet

VIDEO: Shkarkohen dy moderatorët e mëngjesit në RTSH, e pabesueshme gafa që bëjnë

Ditën e sotme emisioni ‘Mirmëngjes Shqipëri’, i cili moderohet nga Valbona Mhilli dhe Ermal Qori nuk vijoi transmentimin si çdo ditë tjetër.

Spas burimeve të ‘IconStyle’ bëhet me dije se kjo ka ndodhur pasi Valbona dhe Ermali janë pushuar nga puna.

Arsyet e largimit të tyre nga ky program ende nuk dihen, mirëpo duhet t’ju kujtojmë se së fundmi, në rrjet janë bërë virale disa pjesëza nga emisioni i tyre, i cili nis që në orën 06:00 të mëngjesit.

“Holauskët” është shqiptimi që Valbona bëri për holokaustin dhe ky moment u bë viral, duke u komentuar së tepërmi në rrjet.

Gjithashtu dy moderatorët nuk dinin të lexonin fjalën Auschwitz, duke fajësuar gjermanishten!