Anëtarët e NATO-s duhet të kenë prioritet armatosjen e Ukrainës në vend të forcimit të aftësive të tyre mbrojtëse, tha të mërkurën sekretari i përgjithshëm i bllokut ushtarak, Jens Stoltenberg.

“Një pjesë e përpjekjes së rëndësishme që po bëjmë tani në të gjithë aleancën e NATO-s është për të rritur shpërndarjen e sistemeve tona të mbrojtjes ajrore në Ukrainë”, u tha Stoltenberg gazetarëve në Bruksel.

“Por Ukraina ka nevojë edhe më shumë. Kjo është arsyeja pse nëse aleatët përballen me një zgjedhje midis përmbushjes së objektivave të aftësisë së NATO-s dhe ofrimit të më shumë ndihmë për Ukrainën, mesazhi im është i qartë: dërgoni më shumë në Ukrainë.”

Stoltenberg vuri në dukje Danimarkën si “një shembull të fortë” pasi u zotua në shkurt të dhuronte të gjithë artilerinë e saj në Kiev. Ai vlerësoi Danimarkën dhe Holandën për planet e tyre për të siguruar avionë luftarakë F-16, duke shtuar se ai ishte “i inkurajuar” nga lajmi se Kongresi amerikan pritet së shpejti të votojë për ndihmë shtesë për Ukrainën, pas vonesës disa mujore.

Apeli i shefit të NATO-s vjen në një kohë kur shtetet anëtare po luftojnë për të ofruar sasi të mjaftueshme armësh në Ukrainë pa i varfëruar rezervat e tyre dhe pa rrezikuar sigurinë. Zyrtarët në Kiev kanë fajësuar mungesën e municioneve për kundërsulmin e dështuar të vitit të kaluar, si dhe humbjet e fundit në fushën e betejës.

Izraeli do t’i marrë vetë vendimet për mënyrën se si do ta mbrojë veten, tha kryeministri izraelit Benjamin Netanyahu të mërkurën, pasi vendet e Perëndimit i bënë thirrje përsëri të vetëpërmbahet nga hakmarrja ndaj Iranit.

Shtetet e Bashkuara, Bashkimi Evropian dhe grupi i vendeve të industrializuara (G7), njoftuan se po shqyrtojnë sanksione më të fuqishme kundër Iranit, të cilat thuhet se do të vendosen për ta kënaqur Izraelin dhe për ta bindur atë të mos i përgjigjet sulmit të Iranit.

Teherani i lëshoi qindra dronë dhe raketa drejt Izraelit më 13 prill, duke e kryer sulmin e parë të drejtpërdrejtë kundër armikut të vet të përbetuar.

Netanyahu u takua me sekretarin e Jashtëm të Britanisë së Madhe, Davi Cameron dhe me ministren e Jashtme gjermane, Annalena Baerbock, të cilën e vizituan Izraelin të mërkurën në përpjekje për të mos e lejuar përshkallëzimin e tensioneve mes Izraelit dhe Iranit.

Zyra e Netanyahut tha se e ai i falënderoi Cameronin dhe Baerbockun për mbështetjen e tyre, derisa u tha atyre: “Dua të jem i qartë – ne i marrim vetë vendimet tona dhe shteti i Izraelit do të bëjë gjithçka që është e nevojshme për ta mbrojtur veten”.

Më herët, Cameron tha se është e qartë se Izraeli ka bërë plane për t’u hakmarrë ndaj sulmit iranian me dronë dhe raketa, të cilin Teherani e kreu si përgjigje ndaj një sulmi të dyshuar izraelit nga i cili u vranë zyrtarë ushtarakë në konsullatën iraniane në Siri më 1 prill.

Baerbock tha se përshkallëzimi “nuk do t’i shërbejë askujt, as sigurisë së Izraelit, as shumë prej dhjetëra pengjeve që ende po mbahen nga Hamasi [grupi i shpallur terrorist nga SHBA dhe BE], as popullsisë së përvuajtur në Gazë, as shumë njerëzve në Iran të cilët po vuajnë nën sundimin e regjimit, dhe as vendeve të treta në rajon, të cilat thjesht duan të jetojnë në paqe”.

Pas më shumë se gjashtë muajve luftë në Rripin e Gazës mes Izraelit dhe Hamasit, e cila i ka rritur tensionet në Lindjen e Mesme, diplomatët po kërkojnë mënyra për ta shmangur një luftë të drejtpërdrejtë mes Izraelit dhe Iranit.

Shumica dërrmuese e dronëve dhe raketave iraniane të lëshuara drejt Izraelit të shtunën u rrëzuan nga ky i fundit dhe aleatët e tij, dhe nuk shkaktuan viktima.

Por, Izraeli thotë se i duhet të hakmerret patjetër për ta ruajtur besueshmërinë e mbrojtjes së vet. Irani, në anën tjetër, thotë se kjo çështje është e mbyllur, por se do të hakmerret nëse Izraeli e sulmon./ REL

Sekretari i Jashtëm britanik, David Cameron tha se ishte e qartë se Izraeli kishte marrë një vendim për t’iu përgjigjur sulmit iranian me dronë dhe raketa balistike që ndodhi gjatë fundjavës.

Megjithatë, ai theksoi se shpreson që kjo të bëhet në mënyrë që të minimizohet përshkallëzimi i konfliktit.

“Është e qartë se Izraeli ka marrë një vendim për t’u hakmarrë”, tha ministri britanik në një bisedë me mediat në Izrael.

Britania e Madhe dëshiron të shohë sanksione të koordinuara kundër Iranit, nënvizoi ai, teksa shtoi se G7 duhet t’u dërgojë Teheranit një mesazh të qartë.

Pak ditë më parë, liderët e vendeve të G7 zhvilluan një takim ku dënuan sulmin iranian ndaj Izraelit.

“Me veprimet e tij, Irani ka bërë një hap shtesë drejt destabilizimit të rajonit dhe rrezikon të shkaktojë një përshkallëzim të pakontrolluar rajonal. Kjo duhet të shmanget”, pohoi ai.

Emiratet e Bashkuara Arabe po regjistrojnë shiun më të dendur ndonjëherë pas një stuhie të fortë që goditi vendin ditën e të hënën (15 prill), duke vrarë të paktën një person si dhe duke shkaktuar dëme në shtëpi dhe biznese si dhe duke bllokuar udhëtimin ajror.

Sipas ‘Indian express’, shiu ishte “një ngjarje historike e motit” që tejkaloi “çdo gjë të dokumentuar që nga fillimi i mbledhjes së të dhënave në 1949″ – që ishte përpara se Emiratet e Bashkuara Arabe të themeloheshin.

Shirat e dendur janë të pazakonta në Emiratet e Bashkuara Arabe, i cili është një vend i thatë, i Gadishullit Arabik. Megjithatë, ato ndodhin herë pas here në rajon gjatë muajve më të ftohtë të dimrit.

Cfare ndodhi?

Stuhitë filluan të hënën në mbrëmje dhe të martën në mbrëmje ishin hedhur më shumë se 142 milimetra (mm) shi në qytetin e shkretëtirës së Dubait. Një vit mesatarisht sheh 94.7 milimetra shi në Aeroportin Ndërkombëtar të Dubait, aeroporti i dytë më i ngarkuar në botë, i cili regjistroi më shumë se 80 milionë vizitorë në 2023.

Shirat e dendur çuan në ndërprerje të udhëtimit ajror pasi fluturimet ose u devijuan ose u vonuan. Sipas autoriteteve të aeroportit, operacionet u pezulluan përkohësisht për 25 minuta pasditen e së martës. Edhe pse shirat e dendur u qetësuan deri të martën vonë, ndërprerjet vazhduan deri të mërkurën.

Në të gjithë Dubain, shtëpitë u përmbytën dhe automjetet u braktisën në rrugë. Qendrat tregtare të njohura si Dubai Mall dhe Mall of the Emirates u përmbytën gjithashtu. Shkollat ​​u mbyllën në të gjithë Emiratet e Bashkuara Arabe. Në Dubai, qeveria zgjati punën nga shtëpia për punonjësit e saj deri të mërkurën.

Çfarë shkaktoi shirat e dendur?

Arsyeja kryesore për këto shira të dendur ishte një sistem stuhi, i cili po kalonte përmes gadishullit arab dhe po lëvizte nëpër Gjirin e Omanit. Sipas një raporti nga AP, shirat mund të ishin përkeqësuar nga mbjellja e reve, një proces i spërkatjes së përzierjeve të kripës në re që do të rezultonte në kondensimin e reve dhe përfundimisht do të shkaktonte reshje.

A është ndryshimi i klimës përgjegjës për ngjarjen?

Disa ekspertë kanë treguar se temperaturat në rritje globale mund të jenë gjithashtu fajtore. Temperaturat më të larta shkaktojnë avullimin e ujit jo vetëm nga toka, por edhe nga oqeanet dhe trupat e tjerë ujorë, që do të thotë se një atmosferë më e ngrohtë mban më shumë lagështi.

Studimet kanë zbuluar se për çdo 1 gradë Celsius rritje të temperaturës mesatare, atmosfera mund të mbajë rreth 7% më shumë lagështi. Kjo i bën stuhitë më të rrezikshme pasi çon në një rritje të intensitetit, kohëzgjatjes dhe/ose shpeshtësisë së reshjeve, të cilat në fund mund të shkaktojnë përmbytje të rënda./ D.M