Kosova nuk do mbijetojë/ Analisti amerikan ka dy fjalë për Kurtin

Për ekspertin amerikan, i cili ka qenë i përfshirë në mënyrë të drejtpërdrejtë në negociatat izraelito-siriane dhe izraelito-palestineze në formatin “Track II” e njohur ndryshe si “diplomacie e kanaleve të pasme” Alon Ben – Meir, kryeministri i Kosovës, Albin Kurti është i zhytur në obsesionin e tij me Serbinë, duke mos e kuptuar kurrë se pavarësia, siguria dhe mirëqenia e Kosovës nuk varen nga ajo që thotë apo bën presidenti i Serbisë, Aleksandër Vuçiç, por nga angazhimet e Bashkimit Evropian dhe Shteteve të Bashkuara të Amerikës për të ruajtur sigurinë dhe pavarësinë e Kosovës. Sipas Ben-Meir, është e habitshme se përse një politikan si Kurti që e konsideron veten të ditur dhe i përkushtuar ndaj interesave kombëtare të vendit të tij, arrin të largojë miqtë e tij më të mirë, pa të cilët Kosova nuk mund të mbijetojë si një vend i pavarur dhe i sigurt. “Ndoshta Kurti duhet të marrë pak kohë dhe të reflektojë se pse dhe në çfarë rrethanash BE-ja mund të minojë interesat kombëtare të Kosovës vetëm për të qetësuar Serbinë”, ka shkruar Ben-Meir Pikëpamja e Kurtit se BE-ja po dëshiron të akomodojë Serbinë në kurriz të Kosovës, sipas ekspertit amerikan është edhe e gabuar edhe kundërproduktive. “Ai duhet ta dijë se nëse dëshiron që Kosova të anëtarësohet në BE në një të ardhme të afërt, duhet të punojë krah për krah me BE-në në çdo aspekt dhe të shmangë çdo konflikt që mund të pengojë procesin e integrimit” – theksoi eksperti amerikan duke shtuar se Kurti duhet ta ketë të qartë se fajësimi i Kosovës nga ana e BE-së për dështimin e dialogut “nuk është i pabazë”. Sipas tij, Kurti po gabon kur pohon se Kosova do ta zbatojë të gjithë marrëveshjen në tërësi dhe nuk do ta zbatojë vetëm atë që dëshiron Serbia. – “Kjo logjikë ka vdekur”, theksoi Ben-Meir. Problemi në këtë fazë të dialogut, sipas tij, është se Kurti dhe Vuçiç po kërkojnë që tjetri të bëjë hapin e parë në zbatimin e marrëveshjes. Kryeministri I Kosoves fillimisht kërkon njohjen defacto nga Serbia e më pastaj zbatimin e Asociacionit të Komunave me Shumicë Serbe, Vuçiç-i të kundërtën – njëherë Asociacioni dhe pastaj nenet e tjera të Marrëveshjes së Brukselit/Ohrit. “Në këtë aspekt, megjithatë, barra bie krejtësisht mbi supet e Kurtit, i cili deri më tani ka refuzuar themelimin e Asociacionit, për të cilin Kosova kishte rënë dakord dhe duhej të zbatohej shumë kohë më pare” – shpjegoi eksperti Ben Meir, sipas te cilit Albin Kurti duhet të kujtojë se ekziston një shqetësim i madh në Perëndim se Rusia mund të përdorë Beogradin për të rindezur konfliktet etnike në Ballkan, veçanërisht pas agresionit në Ukrainë. Dhe për të parandaluar që kjo të ndodhë, BE-ja duhet të tërheqë Serbinë në orbitën e saj. “Është marrëzi të supozohet se përpjekjet e BE-së në këtë aspekt do ta dëmtojnë Kosovën në çfarëdo forme. Përkundrazi, sa më shumë që Serbia t’i afrohet BE-së, aq më mirë është për Kosovën, pasi kjo do të çonte pa ndryshim në një atmosferë më të favorshme që do të përshpejtonte procesin e normalizimit ndërmjet Kosovës dhe Serbisë, si dhe njohjen e saj nga Beogradi” – u shpreh Alon Ben Meir. Sipas tij, tani është koha që Kurti të zbresë në tokë dhe të mos marrë më pozicione krejtësisht të papajtueshme me atë që dikton realiteti.