Skenar me Dodikun, Serbia kërcënon hapur Kosovën

Kreu i republikës Serpska në Bosnje, Millorad Dodik javën e kaluar ka kërkuar krijimin e “Serbisë së Madhe”. Sipas tij, brenda këtij shekulli, serbët duhet të formojnë një shtet të vetëm, pjesë e të cilit të jetë edhe Mali i Zi.

“Ne po jetojmë në një epokë kur pas disa vitesh apo dekadash do të duhet të krijohet një konfigurim i ri i botës, serbët nuk duhet të kapen në befasi, por të krijojnë një shtet të vetëm, me Malin e Zi brenda” – deklaroi Dodik

Në të njëjtën linjë me Dodikun, ka qene edhe presidenti serb, Aleksandër Vuçiç, i cili ka deklaruar se kurrë nuk do ta njohë Kosovën.

Sipas analistëve dhe njohëseve të zhvillimeve politike në vend e rajon, ky është një kërcënim i hapur ndaj perëndimit, kërcënim prapa të cilit qëndron Serbia.

Krejt kjo, sipas doktorit të marrëdhënieve ndërkombëtare, Gurakuç Kuçi vjen pasi Gjermania, Franca dhe Italia kërkuan hapa konkret nga Serbia për njohjen e Kosovës.

“Kërkesa e fundit nga liderët e Gjermanisë, Francës dhe Italisë që Serbia të bëj hapa konkret drejt njohjes “de fakto” të Kosovës e ka vënë Serbinë me shpatulla pas murit por dhe si kundërveprim të nis përdorimin e “taktikave kërcënuese” ndaj perëndimit. Nuk është hera e parë që Serbia përdor Republika Serpskan dhe elementë tjerë serbë në shtetet e Ballkanit Perëndimor për të kërcënuar perëndimin. Së fundmi këtë e ka bërë duke e përdorur qasje në projektet strategjike të Kinës” – U shpreh Kuçi.

Sipas tij, “Serbia së fundmi ka shpërndarë Kuvendin e saj duke shpallur zgjedhje të reja, ku arsyeja e vërtet e këtyre zgjedhjeve është Kosova. Koalicioni pro Vuçiçit pritet prapë të fitoj shumë më bindshëm, por përveç kësaj ai dëshiron që përgjegjësinë e tij ta shpërndajë me struktura të tjera shtetërore dhe publikisht të mos bie e gjithë barra mbi të, por prapë vendimi të jetë sipas planeve të tij. Pra kërcënimet dhe zgjedhjet janë një lloj pakoje e Serbisë për të shmangur shkuarjen drejt zbatimit të marrëveshjes së Brukselit dhe aneksit të Ohrit” –  nënvizoi Gurakuç Kuçi, sipas të cilit, “plani i Vuçicit është që ta shtyjë sa më shumë çështjen e Kosovës, në mënyrë që ajo të përfundojë në konferencë ndërkombëtare”

“Vuçiç e di se do të arrijë në një pikë kur SHBA-ja dhe BE-ja do i kërkojnë të qartësojë qëndrimet e tij dhe ai këtë do mundohet që ta shtyjë për të paktën edhe disa vite, deri në krijimin e një rendi të ri ndërkombëtar ku çështja e Kosovës të përfundojë në konferencë ndërkombëtare. Dyshoj që perëndimi do lejoj që këto dëshira serbe të përsëritën, sikurse gabimet në Dejton dhe këtë pak a shumë e kanë bërë të qartë, megjithatë Kosova duhet të jetë shumë vigjilente dhe të mos bëj veprime të “yryshit” – potencoi analisti politik, duke paralajmëruse se edhe në rast të njohjes nga Serbia, paqja nuk është e sigurtë.

“Serbia do mundohet të presë pafundësisht për një moment tjetër gjeopolitik të ndonjë ndryshimi të raportit të forcave. Njohja de fakto nga Serbia nuk siguron edhe paqen me Serbinë apo që kjo e fundit nuk do tjetërsojë marrëveshjet siç ka bërë edhe më herët” – theksoi Gurakuç Kuçi.