Aktualitet

Konkurrenca ul ndjeshëm biletat e avionëve, deri në 10-15 euro

Shtimi i konkurrencës mes operatorëve low cost në vend ka ulur sërish ndjeshëm biletat e fluturimeve nga dhe drejt Rinasit, pas rritjes që ato shënuan në muajt e parë të vitit. Me hyrjen e irlandezëve të Ryanair nga fundi i tetorit, konkurrenca është shtuar teksa tashmë janë dy operatorë me kosto të ulëta, përfshirë hungarezët e Wizz Air, që operon prej disa vitesh në tregun vendas. Nëse kërkon të blesh një biletë për një udhëtim pas tre apo katër javësh mund të gjesh në destinacione dhe orare të caktuara bileta që fillojnë nga 10 deri në 15 euro për një drejtim, ose 30-50 euro për bileta vajtje-ardhje nga të dy këto operatorë. Biletat janë shumë më të lira se në pjesën e parë të viti, ku ato u rritën ndjeshëm dhe mesatarisht kushtonin mbi 100 euro, teksa Wizz Air, që hyri fillimisht me çmime të lira i shtrenjtoi ato, pasi mori mbi 60% të tregut të fluturimeve. Por, shtimi i konkurrencës, pas lajmit se do të hynte Ryanai “detyroi” Wizz që të ulte sërish çmimet në gjysmën e dytë të vitit.

Italia më e lira, ulet dhe Anglia

Një udhëtim vajtje ardhje për datat 2-5 dhjetor në Milano, kushton rreth 50 euro me Wiiz Air. Me Ryanair për të njëjtat data Milano është e arritshme me 36 euro. Milano është destinacioni që ka më shumë fluturime ditore, 5 herë në ditë me Wizz dhe dy herë në ditë me Ryanair.

Për në Romë, në të njëjtat data vajtja për në Romë me Wizz Air kushton 10 euro dhe kthimi 18 euro, për një total prej 28 eurosh (kjo është alternativa më e lirë). Me Ryanair për të njëjtat data, bileta kushton 30 euro.

E arritshme me bileta të lira është dhe Anglia. Edhe në Londër, për të njëjtat data, bileta kushton 30 euro vajtje ardhje me Wizz dhe po kaq kushton dhe me Ryanair. Ky i fundit ka dhe dy destinacione të tjera drejt Mbretërisë së Bashkuar, Edinburg dhe Mançester. Me Edinburgun, për të njëjtat data, bileta vajtje-ardhje është 37 euro,

Drejt Gjermanisë është pak më shtrenjtë, teksa dhe numri i fluturimeve është më i ulët, përgjithësisht 3 herë në javë, Për datën 4 dhjetor drejt Berlinit bileta kushton nga 45 euro dhe kthimi me datë 8 dhjetor 50 euro, në total 95 euro. Në Frankfurt në datat 2 dhe 5, bileta vajtje ardhje po me Wizz kushton 70 euro.

Krahas destinacioneve tradicionale është shtuar ndjeshëm dhe gjeografia e fluturimeve si në Pragë, qytetet e Polonisë (nxitur dhe nga flukset turistike nga ky shtet), Norvegji, Suedi, Holandë, Spanjë, Rumani (Bukuresht), etj. Për në Bukuresh, psh, në datat 5 dhe 7 dhjetor, bileta kushton 30 euro vajtje-ardhje me Ryanair.

Mos i lini biletat për ditën e fundit se do i paguani shtrenjtë (deri në 300 euro)

Nga një kërkim në faqet e internetit të dy operatorëve low cost rezulton se koha më e mirë për të prerë një biletë është 3-4 javë përpara se të udhëtoni.

Nëse e lini biletën për ditën e fundit, apo ju del ndonjë urgjencë e do ju duhet të udhëtoni papritur, çmimet janë të shtrenjta.

Psh, nëse do të blini një biletë për Milano në datën 18 nëntor vajtja ga Rinasi kushton të paktën 55 euro dhe kthimi në 20 nëntor rreth 28 euro, me Wizz Air. Me Ryanair për të njëjtat data vajtja fillon nga 37 euro dhe kthimi 20 euro.

Nëse e pret biletën dy ditë para, çmimet fillojnë nga më shumë se 100 euro në një drejtim deri në 300 euro për të dy operatorët.

Me afrimin e fundit të vitit, biletat shtrenjtohen për shkak të kërkesës së lartë që ka për të udhëtuar për festa. Por, këtë vit, vajtja në Milano në datat 24 dhe 25 dhjetor me Wizz luhatet me 10-15 euro. Nga Milano në Tiranë biletat kushtojnë 30-50 euro. Bileta të ngjashme ka dhe Ryanair.

Biletat fillojnë e shtrenjtohen në ditët e para të janarit, në 70-150 euro drejt Italisë (periudha kur kthehen emigrantët në shtëpi), ndërsa nga Milano drejt Rinasit vijojnë biletat e lira.

5.4 milionë pasagjerë kanë fluturuar në 9 janar-shtator 2023

Çmimet e lira kanë shtuar ndjeshëm fluksin e udhëtimeve me avion. Sipas të dhënave të INSTAT, për 9 mujorin kanë fluturuar në dhe nga Rinasi rreth 5.4 milionë pasagjerë, me një rritje prej 36% në krahasim me të njëjtën periudhë të një viti më parë.

Biletat e lira të avionëve kanë qenë një nga arsyet kryesore që kanë nxitur turizmin, që këtë vit arriti nivelin më të lartë historik.

Operatori me kosto të ulët Wizz Air kishte 62% të tregut sipas numrit të pasagjerëve në shtator 2023, sipas të dhënave nga Tirana International Airport. Wizz ka marrë vazhdimisht treg nga operatorët e tjera si Air Albania dhe Alba Wings, që kishin përkatësisht 7.8% dhe 6.1% të tregut në fund të shtatorit.

Hyrja e Ryanair nga fillimi i nëntorit të këtij viti pritet që të riformatojë sërish tregun, duke ushtruar më shumë presion mbi operatorët që kanë humbur vazhdimisht terren dy vitet e fundit. Psh në shtator të vitit 2021, Wizz kishte 37% të tregut, Air Albania rreth 14% dhe Albawings rreth 8%./MONITOR

Related Topics:aeroport aktualitet avione bileta cmime fluturime konkurenca kryesore rinas

Aktualitet

Vranë djalin dhe tentuan t’a fshehin si aksident, Prokuroria e Korçës përfundon hetimet dhe dërgon në gjyq prindërit

Vrau të birin dhe tentoi t’a fshehë si aksident, Prokuroria Korçë përfundon hetimet dhe dërgon në gjyq prindërit

Prokuroria pranë Gjykatës së Shkallës së Parë të Juridiksionit të Përgjithshëm Korçë, mbylli hetimet dhe dërgoi në gjyq shtetasit Sh.B. i akuzuar për kryerjen e veprës penale të “Vrasje për shkak të marrëdhënieve familjare” si dhe shtetasen H.B. për kryerje të veprës penale “Deklaratat e rreme para oficerit të policisë gjyqësore”, parashikuar nga neni 305/ i Kodit Penal.

Nga tërësia e provave të grumbulluara gjatë hetimit për procedimin penal nr.126/2023, rezulton e provuar se në datën 17.02.2023, rreth orës 16:00, është marrë njoftim se në Urgjencën e Spitalit Rajonal Korçë, ishte transportuar me autoambulancë për të marrë ndihmë mjekësore shtetasi H. B., me dëmtime në pjesën e kokës. Ky shtetas, pak çaste më vonë, ka ndërruar jetë në ambientet e reanimacionit të këtij spitali. Sipas pretendimeve të para të familjarëve, ai ishte rrëzuar dhe kishte vrarë kokën, në oborrin e banesës, duke qenë në gjendje të dehur.

Nga veprimet hetimore, rezultoi se ngjarja e paraqitur si aksidentale, në fakt ishte ngjarje kriminale dhe në orën 02:00, të datës 18.02.2023, u bë arrestimi në flagrancë i babait të viktimës, shtetasit Sh. B., si i dyshuar për kryerjen e kësaj vepre penale, konkretisht “Vrasja për shkak të marrëdhënieve familjare”, parashikuar nga neni 79/c i K.Penal”, i cili pranoi autorësinë e krimit.

Është marrë deklarim nga shtetasia H.B., mamaja e viktimës, e cila ka deklaruar se i biri është kthyer nga Franca pasi është divorcuar me të shoqen dhe që atëherë konsumonte shumë alkool. Ajo ka qenë me bashkëshortin në banesë kur ka dëgjuar zhurmën e derës së oborrit. Ata kanë dalë dhe kanë parë Hamdiun, i cili ishte i gjakosur nga koka dhe ata e kanë futur në shtëpi. Çka nuk rezultoi e vërtetë.

Sa më sipër, nga tërësia e veprimeve hetimore të kryera dhe aktet e administruara në fashikullin e procedimit penal, rezulton e provuar se shtetasi Sh. B., ka konsumuar elementët e veprës penale të parashikuar nga neni 79/c i Kodit Penal, pasi me veprimet e tij aktive, të kundërligjshme, të kryera me dashje, ka vrarë djalin e tij, shtetasin H.B.

Në rastin konkret, autori me dashje dhe me vullnet të plotë si dhe me qëllimin për ta vrarë, ka goditur djalin e tij në kokë, disa herë. Ai ka marrë dhe ka përdorur çekiç gurësh dhe dru zjarri si armë të krimit dhe pasi i ka dhënë goditjet fatale të birit, është përpjekur ta mbulojë krimin si vetëdëmtim të viktimës, duke përforcuar idenë që veprimet e tij në drejtim të vrasjes të të birit kanë qënë të vullnetshme dhe të qëllimta për të sjellë pasojën e dëshiruar, humbjen e jetës të të birit.

Sa më sipër e bazuar në kërkesat e nenit 331 të K.Proc.Penale Prokuroria pranë Gjykatës së Shkallës së Parë Korçë, kërkoi:

– Dërgimin në gjyq të çështjes penale Nr.126/2023 me të pandehur shtetasin Sh. B., akuzuar për kryerjen e veprës penale të “Vrasja për shkak të marrëdhënieve familjare”, parashikuar nga neni 79/c i K.Penal dhe me të pandehur shtetasen H. B., akuzuar për kryerjen e veprës penale “Deklaratat e rreme para oficerit të policisë gjyqësore”, parashikuar nga neni 305/b i Kodit Penal

Aktualitet

VIDEO/ Qentë e rrugës në Vlorë kafshojnë turisten buzë lungomares

Një incident është regjistruar mëngjesin e kësaj të diele në Vlorë, ku një turiste e huaj është kafshuar nga qentë e rrugës.

Ngjarja ka ndodhur buzë lungomares, ku turistja, një vajzë në moshë të re, kishte dalë për të vrapuar. Siç shihet edhe në videon e mëposhtme, katër qenësh rruge i janë sulur, duke e kafshuar në këmbë.

Banorët e zonës i kanë dhënë ndihmën e parë turistes, duke e dezinfektuar plagën me alkool. Ky nuk është incidenti i parë që qentë e rrugës sulmojnë qytetarët.

Aktualitet

Kthjellime dhe vranësira, si do të ndryshojnë temperaturat këtë fundjavë

Vendi ynë, parashikohet të jëtë me mot të kthjellët dhe të ngrohtë gjatë gjithë paradites.

Ndërsa pjesa e dytë e ditës, do të dominohet nga kthjellime dhe vranësira të lehta e kalimtare në bregdet dhe zonat e ulëta, duke lënë me kthjellime dhe vranësira disi më të dendura zonat malore Lindore, ku nuk do të mungojnë edhe shirat e dobët e lokalë.

Temperaturat e ajrit do të pësojnë rritje në mëngjes, por ulen lehtë në mesditë, duke luhatur vlerat ditore nga 5°C vlera më e ulët në verilindje të vendit, deri në 24 gradë Celcius pritet vlera maksimale në qarqet Elbasan dhe Berat.

Era do të fryjë e lehtë dhe mesatare si në tokë dhe në det, me shpejtësi deri në 28 km/h nga drejtimi Perëndimor dhe Veriperëndimor, kjo do të sjellë në brigjet e Adriatikut dhe Jonit dallgëzim të ulët.

Aktualitet

Digjet makina te “Rruga e Kavajës”, tymi mbulon të gjithë zonën

Një makinë është përfshirë nga flakët mbrëmjen e sotme në “Rrugën e Kavajës” në Tiranë.

Sipas raportimeve paraprake fatmirësisht nuk raportohet për të lënduar. Shoferi ka mundur të dalë nga mjeti pa lëndime.

Siç mund të shihet dhe në foton e mësipërme zjarri ka përfshirë pjesën e përparme të mjetit. Forcat zjarrfikëse kanë arritur në vendngjarje dhe kanë mundur të neutralizojnë flakët.

Ende nuk dihen shkaqet e zjarrit, ndërsa parprakisht dyshohet për një defekt tenkik në mjet.

Aktualitet

Ish-ekonomisti i Bankës Botërore: Ja si ndikon vendlindja në nivelin e të ardhurave

Studimet tregojnë se vendeve të Ballkanit Perëndimor do t’u duhen rreth pesë deri në gjashtë dekada për të arritur nivelin e zhvillimit ekonomik të mesatares së vendeve të BE-së.

Ndërkohë që pabarazia në nivelin global duket që është zbutur si pasojë e rritjes ekonomike të Kinës gjatë dekadës së fundit, periudha që kaluam fillimisht me COVID-in dhe më pas me konfliktet të cilat po jetojmë, kanë pasur një ndikim negativ për sa i përket uljes së pabarazisë.

Megjithatë, brenda vetë Europës, brenda Perëndimit dhe brenda shumë vendeve që janë në listën e vendeve më të zhvilluara, pabarazitë janë rritur.

Cilët janë faktorët që ndikojnë në zbutjen e pabarazisë? Gjeografia? Pra, vendi ku ne lindim dhe jetojmë? Statusi shoqëror, prejardhja familjare? Mundësitë që na jep jeta dhe sistemi politik e ekonomik në të cilin ne jetojmë? Cili është ndikimi i teknologjisë në këtë proces? Ndikimi i forcave migratore?

Për të gjitha këto, Ditmit Bushati diskuton në podcast-in “Public Square” me një ekonomist të famshëm amerikan, me origjinë serbe, Branko Milanović, i cili për shumë vite ka punuar si ekonomist pranë Bankës Botërore, dhe tanimë është profesor në City University of New York.

“Po t’i referohemi nivelit global, kemi njerëz nga vende të ndryshme. Nëse dikush ka liundur në Malish, fashat prej nga burojnë të ardhurat, krahasuar me pjesën tjetër të botës, janë të kufizuara, edhe nëse ky person i përket një grupi të një niveli të lartë, edhe sikur të jetë Presidenti i Malit, të ardhurat e tij do të jenë sa 20% e të ardhurave në Francë.

Kështu që, kur mbledhin të dhënat global, ajo që vëmë re është që një pjesë e madhe të ardhurave tona përcaktohen nga vendi ku jetojmë . Dhe për 95-96% e popullatës, ky është vendi ku kanë lindur.

Fillimisht vetëm dhe më pas me një koleg, kam bërë disa përshtatje në lidhje me sesa ndikon niveli i arsmit dhe të ardhurave të prindërve. Ajo që mbetet e pashpjegueshme, ku përfshihen përpjekjet e bëra, fati apo të tjerat, është rreth 20-30%. Kjo është baza e atij citimit të famshëm se ‘rrëth 50-60% e të ardhurave tonë në nivel global përcaktohen nga vendi ku jetojmë, 20% përcaktohen nga prindërit tanë sesa të pasur dhe të arsimur kanë qenë dhe 20-30% përcaktohen nga ne’.

Kjo është një gjetje interesante sepse na tregon sesa të mëdha janë ndryshimet në botë dhe si vendi i lindjes është i rëndësishëm për ecurinë e të ardhurave tonë në të ardhmen”, tha ai.