40 ditë ferri në Rusi/ Ukraina zgjeron goditjet me dronë larg vijës së frontit

Ukraina ka shpallur përfundimin e një operacioni 40-ditor me sulme të vazhdueshme ndaj objektivave strategjikë në territorin rus, një fushatë që, sipas autoriteteve në Kiev, kishte si synim rritjen e presionit mbi Kremlinin dhe detyrimin e Moskës për t’u angazhuar në negociata.

Operacioni, i quajtur “40 Ditët e Presionit”, u zhvillua nga fundi i qershorit deri më 4 gusht dhe, sipas Shërbimit të Sigurisë së Ukrainës (SBU), përfshiu përdorimin e dronëve dhe raketave kundër bazave ajrore, rafinerive të naftës, industrisë ushtarake dhe infrastrukturës logjistike ruse.

Një nga sulmet më të rëndësishme, sipas Kievit, ishte ai ndaj rafinerisë së naftës në Omsk, rreth 2 500 kilometra larg kufirit me Ukrainën. Autoritetet ukrainase e cilësuan këtë si goditjen më të largët të konfirmuar me dron, duke pretenduar se objekti pësoi dëme të konsiderueshme, edhe pse vijoi funksionimin.

Sipas SBU-së, gjatë kësaj fushate janë goditur 14 rafineri nafte, dhjetëra depo karburanti, terminale dhe stacione pompimi, si edhe një platformë nafte në Detin Kaspik. Kievi pretendon se këto sulme kanë ndikuar në furnizimin me karburant në disa rajone të Rusisë dhe kanë ushtruar presion mbi sektorin energjetik.

Autoritetet ukrainase deklarojnë gjithashtu se gjatë operacionit janë goditur mbi 100 objekte strategjike në territorin rus dhe në zonat e pushtuara të Ukrainës. Mes objektivave të përmendura janë baza ajrore, ndërmarrje të industrisë së mbrojtjes, qendra komanduese, sisteme të mbrojtjes ajrore, infrastrukturë transporti dhe logjistike, si edhe mjete detare.

Në bilancin e publikuar nga Kievi përfshihen edhe pretendime për goditjen e disa avionëve ushtarakë, përfshirë një bombardues strategjik Tu-95MS, dy avionë luftarakë Su-35 dhe dy avionë stërvitorë L-39, si dhe për neutralizimin e radarëve dhe sistemeve të mbrojtjes ajrore, mes tyre Nebo-U, një radar të sistemit S-400, si dhe sistemet Tor-M2 dhe Pantsir-S2.

Autoritetet ukrainase deklarojnë se qëllimi i kësaj fushate ishte të demonstronin se Ukraina është në gjendje të godasë objektiva strategjikë shumë larg vijës së frontit, duke e bërë koston e luftës gjithnjë e më të lartë për Rusinë. Nga ana tjetër, Moska nuk ka konfirmuar në mënyrë të pavarur të gjitha pretendimet e bëra nga Kievi.