Ambasadori rus në SHBA: Uashingtoni nuk dëshiron paqe në Evropë

Ambasadori rus në Uashington, Anatoly Antonov deklaroi se SHBA nuk dëshiron paqe në Evropë. Sipas tij, siç raporton Tass, administrata amerikane njoftoi furnizime të reja me armë për Ukrainën në vlerën 275 milionë dollarë në ditën kur Rusia konfirmoi disponueshmërinë për bisedime për paqen.

“Sinjalet që vijnë nga autoritetet amerikane janë absolutisht të qarta. Uashingtoni nuk dëshiron paqen në Evropë. Ai po bën gjithçka për të zgjatur konfliktin dhe për të rritur viktimat nga pala ruse dhe ukrainase, përfshirë civilët,” tha Antonov, sipas një deklarate nga ambasada ruse

“Është emblematike: Shtetet e Bashkuara njoftojnë furnizimin me produkte vdekjeprurëse nga industria vendase e mbrojtjes në të njëjtën ditë kur udhëheqja ruse konfirmoi qartë dhe pa mëdyshje gatishmërinë e saj për negociata.”, shtoi diplomati rus në Uashington.