Marrëveshja sekrete e energjisë mes Trump dhe Putin për Ukrainën, në “tavolinë” janë disa plane

Marrëveshjet e energjisë si pjesë e negociatave për t’i dhënë fund luftës në Ukrainë janë vënë në tryezë në bisedimet midis Uashingtonit dhe Moskës, raporton Reuters.

Sipas raportit, këto marrëveshje u propozuan si stimuj për të inkurajuar Kremlinin të binte dakord për një armëpushim dhe për të lehtësuar Uashingtonin në heqjen e disa sanksioneve kundër Rusisë

Në fund të fundit, Moskës i është prerë mundësia për shumicën e investimeve ndërkombëtare në sektorin e energjisë dhe për mundësinë e përfundimit të marrëveshjeve të mëdha për shkak të sanksioneve pas pushtimit të Ukrainës që filloi në shkurt të vitit 2022.

Projektet kryesore

Sipas të njëjtit informacion, zyrtarët amerikanë dhe rusë po shqyrtojnë marrëveshjet e energjisë, duke përfshirë rihyrjen e Exxon Mobil në projektin Sakhalin-1 dhe shitjen e pajisjeve të LNG-së.

Për më tepër, sipas burimeve me njohuri për bisedimet, zyrtarët diskutuan mundësinë e rikthimit të Exxon Mobil në projektin rus të naftës dhe gazit Sakhalin-1.

Ata diskutuan gjithashtu mundësinë e Rusisë për blerjen e pajisjeve amerikane për projektet e saj të LNG-së, siç është Arctic LNG 2, i cili është subjekt i sanksioneve perëndimore.

Një tjetër propozim në tryezë ishte që SHBA-të të blinin akullthyes me energji bërthamore nga Rusia, raportoi Reuters më 15 gusht.

Bisedimet u zhvilluan gjatë vizitës së të dërguarit të SHBA-së, Steve ëitkoff, në Moskë në fillim të këtij muaji, kur ai u takua me presidentin rus Vladimir Putin dhe të dërguarin e tij për investime, Kirill Dmitriev, sipas tre burimeve.

Ato u diskutuan gjithashtu në Shtëpinë e Bardhë me Presidentin e SHBA-së Donald Trump, sipas dy burimeve, ndërsa këto marrëveshje u ngritën edhe në samitin e Alaskës më 15 gusht.

“Shtëpia e Bardhë donte vërtet të bënte bujë pas samitit të Alaskës, duke njoftuar një marrëveshje të madhe investimi”, tha një nga burimet, duke shtuar se “kështu mendon Trump se ka arritur diçka”.

Trump dhe ekipi i tij i sigurisë kombëtare po vazhdojnë të punojnë me zyrtarët rusë dhe ukrainasë në një takim dypalësh që synon t’i japë fund luftës, tha një zyrtar. Por nuk është në interesin kombëtar të diskutohen më tej publikisht këto çështje, shtoi ai.

Diskutime mes kërcënimeve…

Në të njëjtën kohë, siç komenton botimi, Trump ka kërcënuar të vendosë më shumë sanksione ndaj Rusisë nëse bisedimet e paqes nuk përparojnë, si dhe të vendosë tarifa të rrepta ndaj Indisë, një blerës i madh i naftës ruse.

Këto masa do ta bënin të vështirë për Rusinë të mbante të njëjtat nivele të eksporteve të naftës.

Donald Trump i pëlqen marrëveshjet tregtare, por planet e tij – të cilat përfshijnë gjithashtu rifillimin e rrjedhave të gazit rus në Evropë – janë bllokuar nga Brukseli, i cili ka propozuar një ndërprerje të plotë të importeve të gazit rus deri në vitin 2027.

Diskutimet e fundit janë zhvendosur në marrëveshje dypalëshe midis SHBA-së dhe Rusisë, duke lënë jashtë Bashkimin Evropian, i cili si bllok mbetet mbështetës i palëkundur i Ukrainës.

Në të njëjtën ditë me samitin në Alaska, Putin nënshkroi një dekret që mund t’u lejonte investitorëve të huaj, përfshirë Exxon Mobil, të riblenin aksione në projektin Sakhalin-1.

Kjo është e kushtëzuar, duke kërkuar që aksionarët e huaj të ndërmarrin hapa për të mbështetur heqjen e sanksioneve perëndimore kundër Rusisë.

Exxon u tërhoq nga operacionet e saj në Rusi në vitin 2022 pas pushtimit të Ukrainës, duke regjistruar një dëmtim prej 4.6 miliardë dollarësh. 30% e aksioneve të saj në projektin Sakhalin-1 në Lindjen e Largët Ruse u sekuestrua nga Kremlini atë vit.

SHBA-të kanë vendosur disa raunde sanksionesh mbi projektin Arctic LNG 2, duke filluar nga viti 2022 dhe duke kufizuar aksesin për anijet akullthyese të nevojshme për të operuar në rajon për shumicën e muajve të vitit.

Projekti është kryesisht në pronësi të Novatek, e cila filloi të punojë me lobistët në Uashington vitin e kaluar për të rivendosur marrëdhëniet dhe për të hequr sanksionet.

Reuters raportoi se objekti Arctic LNG 2 rifilloi përpunimin e gazit natyror në prill, megjithëse me një ritëm të ngadaltë.

Projekti ishte menduar të përfshinte tre linja përpunimi të LNG-së. E treta është në fazën e projektimit, me teknologjinë që pritet të furnizohet nga Kina.

Megjithatë, Uashingtoni po kërkon ta bindë Rusinë të blejë teknologji amerikane në vend të asaj kineze, si pjesë e një strategjie më të gjerë për të dobësuar marrëdhëniet Pekin-Moskë, tha një burim.