Kthese e papritur/ Zelensky heq dorë nga Trump, SHBA aleat jo i besueshëm

Një analizë e publikuar në The Atlantic argumenton se Ukraina ka ndryshuar thellësisht qasjen e saj ndaj Shteteve të Bashkuara nën administratën e Donald Trump, duke e trajtuar Washingtonin gjithnjë e më pak si një aleat të besueshëm.

Sipas autorit Phillips Payson O’Brien, presidenti ukrainas Volodymyr Zelensky dhe qeveria e tij kanë kaluar nga përpjekjet për të fituar mbështetjen e Trump-it, në një strategji më të pavarur ndërkombëtare, duke zgjeruar bashkëpunimin ushtarak dhe diplomatik me vende të tjera si Gjermania dhe disa shtete të Gjirit.

Në analizë thuhet se për më shumë se një vit pas rikthimit të Trump në Shtëpinë e Bardhë, Kievi u përpoq të ruante marrëdhënie funksionale me SHBA-të, pavarësisht kufizimeve në ndihmën ushtarake dhe retorikës kritike ndaj Ukrainës. Megjithatë, sipas artikullit, kjo qasje nuk ka sjellë rezultate konkrete.

Zelensky përmendet duke kritikuar hapur vendimet e SHBA-ve, përfshirë lehtësimin e sanksioneve ndaj naftës ruse dhe presionet për një marrëveshje paqeje që, sipas Kievit, favorizon Moskën. Në deklarata publike, ai ka lënë të kuptohet se Rusia ka arritur të ndikojë politikën amerikane në mënyrë të përsëritur.

Artikulli thekson gjithashtu se Ukraina po forcon kapacitetet e saj ushtarake të pavarura, sidomos në fushën e dronëve, dhe po kërkon të ndërtojë një rrjet më të gjerë partnerësh evropianë dhe globalë për siguri dhe prodhim armësh.