Senati amerikan ka miratuar paketën e ndihmës prej 95 miliardë dollarësh, ku përfshihet mbështetje ushtarake për Ukrainën, Izraelin dhe Tajvanin. Paketa parashikon 61 miliardë dollarë ndihma ushtarake për Kievin, të cilat siç tha Pentagoni, mund të fillojnë t’i dërgohen vendit të zhytur në luftë “brenda disa ditësh”. Projektligji kaloi me një votim dypartiak, ku 79 votuan pro dhe 18 kundër. Tashmë legjislacioni i miratuar nga Senati pret vetëm firmën e Presidentit të Shteteve të Bashkuara, Joe Biden. Udhëheqësi i shumicës demokrate në Senat, paralajmëroi kundërshtarët e SHBA-së se, do të bëjnë çdo gjë për të mbrojtur demokracinë.

“Po u themi aleatëve tanë se në qëndrojmë me ju. Po u themi kundërshtarëve tanë, mos e kruani me ne. I themi botës së Shtetet e Bashkuara do të bëjnë çdo gjë për të ruajtur demokracinë dhe mënyrën tonë të jetesës. Vladimir Putin të pendohet për ditën kur vuri në dyshim vendosmërinë amerikane. I lashë një mesazh presidentit Zelenskyy. Ai më kishte telefonuar një ditë më parë dhe i thashë, OK e mbaruam. Tani, shko fito luftën”, u shpreh Chuck Schumer, udhëheqësi i demokratëve në Senat.

Biden përshëndeti miratimin e legjislacionit në Senat në një deklaratë me shkrim.

“Unë do ta nënshkruaj këtë projektligj dhe do t’i drejtohem popullit amerikan, në mënyrë që të mund të fillojmë dërgimin e armëve dhe pajisjeve në Ukrainë këtë javë. Nevoja është urgjente: për Ukrainën, përballë bombardimeve të pandërprera nga Rusia; për Izraelin, i cili sapo u përball me sulme të paprecedentë nga Irani; për refugjatët dhe ata të prekur nga konfliktet dhe fatkeqësitë natyrore në mbarë botën, duke përfshirë Gazën, Sudanin dhe Haitin; dhe për partnerët tanë që kërkojnë siguri dhe stabilitet në Indo-Paqësor”, tha Biden.

“Kjo votë përforcon rolin e Amerikës si një fener i demokracisë dhe udhëheqës i botës së lirë”.

Mbretëria e Bashkuar ka zbuluar planet për të ofruar paketën më të madhe të ndihmës ushtarake britanike për Ukrainën. Kryeministri Rishi Sunak do të zbulojë zyrtarisht planin e ri të ndihmës kur të udhëtojë në Varshavë të martën për bisedime me homologun e tij polak, Donald Tusk.

Paketa vlerësohet në 617 milionë dollarë dhe do të përfshijë më shumë se 400 automjete, 60 varka dhe një numër të pazbuluar raketash me rreze të gjatë veprimi “Storm Shadow”, tha zyra e Sunak në një deklaratë , duke e quajtur atë “ndihmën më të madhe ndonjëherë” të municioneve”.

Njoftimi britanik erdhi pasi SHBA pritet të miratojë një paketë ushtarake dhe ndihme prej 61 miliardë dollarësh për Kievin në Senat pasi Dhoma e përfaqësuesve i dha miratimin e parë.

“Mbrojtja e Ukrainës kundër ambicieve brutale të Rusisë është jetike për sigurinë tonë dhe për të gjithë Evropën,” pohoi Sunak. “Nëse Putini lejohet të ketë sukses në këtë luftë agresioni, ai nuk do të ndalet në kufirin polak”, theksoi ai.

Një fëmijë 15 muajsh ka vdekur si pasojë e një sulmi nga dy qen pitbullë në Salereno të Italisë. Sipas raportimeve dy qentë ishin në pronësi të shoqes së nënës së fëmijës të cilët e kanë sulmuar teksa ai ishte në Kopshtin e shtëpisë.

Nëna ka tentuar të ndërhyjë, por edhe ajo është sulmuar. Megjithatë, nëna e viktimës është jashtë rrezikut për jetën. Gjithashtu mjekët e ndihmës së shpejtë ndërhynë në vend dhe nuk mundën të bënin asgjë tjetër përveçse të konfirmonin vdekjen e fëmijës. ndësa hetimet po vazhdojnë për zbardhjen e dinamikës së ngjarjes.

Një sulm izraelit në territorin iranian mund të ndryshojë rrënjësisht dinamikën e marrëdhënieve mes vendeve në rajon dhe të rezultojë që të mos mbetet asgjë nga “regjimi sionist”, citohet të ketë thënë presidenti iranian Ebrahim Raisi të martën nga agjencia e lajmeve IRNA.

Raisi filloi një vizitë treditore në Pakistan të hënën dhe është zotuar të rrisë tregtinë midis vendeve fqinje në 10 miliardë dollarë në vit.

Të premten, shpërthime u dëgjuan mbi qytetin iranian të Isfahanit në atë që burimet thanë se ishte një sulm izraelit , por Teherani e hodhi poshtë incidentin dhe tha se nuk kishte plane për hakmarrje.

Irani lëshoi ​​një breshëri raketash dhe dronësh në Izrael më 13 prill në atë që tha se ishte hakmarrje për sulmin e dyshuar vdekjeprurës të Izraelit në kompleksin e konsullatës së tij në Damask më 1 prill, por pothuajse të gjithë u rrëzuan.

Burgu më i madh i Britanisë që hapi dyert në vitin 2017 u konsiderua si një model ku u shpenzuan 212 milionë paund për rehabilitimin e kriminelëve. Por vetëm 7 vite më vonë HMP Berwyn në Uellsin e Veriut ka fituar një reputacion shumë të ndryshëm, si epiqendra e një skandali seksual që përfshin Shërbimin e Burgjeve. Vitin e kaluar doli se jo më pak se 18 gra që punonin në super-burgun e kategorisë C për meshkuj të rritur, me një kapacitet prej 2100 personash, ishin shkarkuar ose dhanë dorëheqjen pasi kishin thyer rregullat për marrëdhëniet me të burgosurit.

Një nga rastet është ajo e oficeres në provë Ayshea Gunn, e cila shkëmbeu më shumë se 1200 telefonata, duke përfshirë thirrje me video, me të burgosurin Khuram Razaq. Madje, ajo futi kontrabandë në qelinë e tij një palë kapëse, të fshehura në sytjena. Gjithashu një kolege e saj oficerja Emily Watson kreu një akt seksual me një të burgosur në qelinë e tij, ditën e Krishtlindjes. Ka pasur një rritje alarmante në numrin e oficereve femra nga e gjithë Shërbimi i Burgut HM të shpallur fajtore për lidhje të paligjshme me të burgosurit.

Muajin e kaluar dy punonjëse femra të burgut u paraqitën në Gjykatën e Bolton Crown, të akuzuara për marrëdhënie të njëkohshme me të njëjtin të burgosur. Aleesha Bates, 30 vjeç dhe Jodie Wilkes, 27 vjeç shkëmbyen mijëra mesazhe me një të burgosur në një trekëndësh dashurie të paligjshme në HMP Buckley Hall, Rochdale.

Oficerja e burgut Bates ishte e para që filloi një marrëdhënie me një të burgosur për vepra të trafikut të drogës. Ajo ishte aq e magjepsur sa filloi të shkëmbente mesazhe me të dhe t’i dërgonte foto zhveshur. Madje planifikonte që pasi ai të lirohej të kishin një marrëdhënie së bashku. Marrëdhënia e dytë, me punonjësen e ndihmës operative Wilkes, doli në dritë në vitin 2020 kur në qelinë e të burgosurit u gjet një telefon kontrabandë që përmbante dhjetëra mesazhe.

Të dyja gratë pranuan sjellje të pahijshme në një zyrë publike, ku Bates u dënua me dy vjet e tetë muaj burg dhe Ëilkes u dënua me 12 muaj, e pezulluar për dy vjet. Në tre vitet deri në mars 2023, 31 punonjëse femra të burgut që punonin në burgjet e meshkujve u pushuan nga puna, duke përfshirë një që lindi fëmijën e të dashurit të saj të burgosur dhe një tjetër që kishte numrin e qelisë së tij tatuazh në kofshë.

Kjo është një rritje prej më shumë se 50 për qind ndaj 19 grave të pushuara nga puna në periudhën e mëparshme katërvjeçare dhe kjo shifër nuk përfshin incidentet e regjistruara në burgjet private, të drejtuara nga kompani si G4S, Serco dhe Sodexo. Pesë burra që punonin në burgjet e meshkujve dhe një ose dy gra që punonin në burgjet e grave, u pushuan nga puna për marrëdhënie të papërshtatshme gjatë së njëjtës periudhë.