Arrestohet xhaxhai dhe nipi

Kallashnikovi që shihni në pamje, ishte arma me të cilën xhaxhai dhe nipi, të moshave 38 dhe 22 vjeç përdorën për të kërcënuar një 40 vjeçar e më pas ti vidhnin shtëpinë.

Të dy autorët, Kastriot Guri dhe nipi i tij Xhoni Guri nga Laçi,  u vunë në pranga nga policia në një operacion të quajtur Brreti, ashtu si fshati në Krujë ku ndodhi edhe ngjarja.

Mësohet se në shtëpinë e viktimës, ata vodhën bizhuteri, vegla pune dhe një set kamerash, por që të gjitha u sekuestruan nga policia, si provë që i implikon në vjedhje xhaxhain dhe nipin.

Arrestimi i tyre u krye pak orë pas ngjarjes, pasi policia e Krujës, organizoi operacionin dhe në momentin e arrestimit, hajdutëve ju sekuestruan arma dhe municion luftarak bashke me sendet e vjedhura.

Megjithatë, dyshohet se xhaxhai dhe nipi kanë kryer edhe vjedhje të tjera, për të cilat do të hetojë më tej prokuroria e Krujës. Ndërsa në gjykatë, të dy ata do të përballen me akuzën e vjedhjes me armë të kryer në bashkëpunim.