Dialogu/ Moska përpiqet të prishë negociatat midis Serbisë dhe Kosovës

Rusia po përpiqet të prishë negociatat midis Serbisë dhe Kosovës, përpara bisedimeve për të cilat Brukseli shpreson se do të çojnë në “njohje de facto” midis ish-armiqve, paralajmëroi një zyrtar i BE-së

Të hënën, shefi i politikës së jashtme të BE-së, Josep Borrell do të presë kryeministrin e Kosovës, Albin Kurtin dhe presidentin e Serbisë, Aleksandër Vuçiç, që kërkon të ndihmojë në normalizimin e marrëdhënieve.

Të dyja palët, tha një zyrtar i lartë i BE-së në kushte anonimiteti, kanë pranuar në parim kushtet e një plani të papublikuar të BE-së që do të çonte në rivendosjen e lidhjeve të tyre më shumë se dy dekada pas luftës.

Por suksesi i planit do të varet nga zbatimi i propozimeve nga të dy palët në muajt e ardhshëm, pavarësisht nga përpjekjet e Moskës për të nxitur kundërshtimin në Serbi për çdo marrëveshje.

“Rusia ndërhyri dhe u përpoq të pengonte këtë punë”, tha një zyrtar i lartë i BE-së, duke vënë në dukje se ambasadori “hiperaktiv” i Rusisë në aleatin e saj tradicional Serbinë kishte dhënë një sërë intervistash në media, ku dhe u shpreh se  ‘Nuk është koha e duhur për të trajtuar çështjen e Kosovës dhe duhet pritur derisa të vendoset Rendi i Ri Botëror mes Rusisë dhe Perëndimit’”.

“Unë e shoh këtë si një kërcënim për presidentin Vuçiç, duke e paralajmëruar atë që të mos pajtohet me propozimin”, tha burimi nga Unioni Europian.

“Nuk e kam vërejtur që kjo të ketë ndikim në qëndrimin e presidentit Vuçiq, por sigurisht që ka ndikuar tek një pjesë e opozitës në Serbi dhe kemi parë disa demonstrata të dhunshme”.

Dialogu i udhëhequr nga BE-ja është mbështetur kryesisht nga Franca dhe Gjermania dhe ka marrë mbështetje nga Shtetet e Bashkuara, por ka qenë një proces me pengesa.

Teksti i propozimit evropian nuk është bërë publik, duke i lejuar të dyja palët të paraqesin një interpretim për konsumin e brendshem.

Ndërkohë përditshmëria, udhëtimet dhe biznesi në rajon kanë vuajtur nga pengesat administrative.

“Ju keni dëgjuar dhe disa prej jush kanë shkruar se ky dokument ka të bëjë me njohjen de fakto, dhe vërtetë ka të bëjë me njohjen de fakto”, u tha gazetarëve zyrtari i BE-së

“Ka shumë substancë në këtë letër (BE) që do të relaksonte shumë atmosferën dhe do të largonte kaq shumë nga këto pengesa”, tha ai.

Sipas tij, një pengesë mund të jetë ngurrimi i Prishtinës për të pranuar një “Asociacion të Komunave me Shumicë Serbe” brenda Kosovës, nga frika se kjo do të çonte në krijimin e një rajoni të shkëputur brenda shtetit.

Zyrtari pranoi se përparimi i ngadaltë i aplikimeve nga vendet e tjera të Ballkanit Perëndimor për t’u bashkuar me BE-në e kishte zbehur entuziazmin për Evropën në rajon.

Por ai tha se frika e shkaktuar nga pushtimi rus i Ukrainës duhet të rrisë mbështetjen për planin Serbi-Kosovë dhe një përparim mund të rinisë “lokomotivën” e integrimit evropian.