Frikë nga pushimet e gushtit/ Kosova do ta shfrytëzojë për tensione në Veri

Nënkryetari i Listës Serbe, Igor Simiç në një intervistë goxha sfiduese për Zërin e Amerikës në gjuhën serbe ka bërë me dije se nuk do të marrin pjesë në zgjedhje e reja në veri të Kosovës, pa u plotësuar disa kushte.

“Të flasësh për zgjedhjet, si ndonjë pilulë magjike që do t’i zgjidhë të gjitha çështjet e hapura, është vërtet e papërgjegjshme”, tha Simiç dhe përmendi largimin e kryetarëve shqiptarë nga komunat veriore dhe tërheqjen e njësive speciale të Policisë së Kosovës, si parakushte për zgjedhje të reja me pjesëmarrjen e serbëve.

“Nëse nuk ka depërshkallëzim, historia për zgjedhjet është një histori hipotetike” – theksoi Nënkryetari i Listës Serbe

Simiq pohoi se shqetësimin ua kanë përcjellë edhe zyrtarëve amerikanë me të cilët përfaqësuesit e Listës Serbe u takuan në Washington.

“Dallimi i vetëm është se tek ata ka shpresë se do të ndodhë depërshkallëzimi, por unë si njeri që jetoj në zonën e Kosovës nuk e shoh. Më shqetëson periudha që na pret, se dikush në Prishtinë do ta shfrytëzojë këtë kohë pushimesh për të krijuar një problem tjetër në veri me lëvizje të njëanshme”, tha Igor Simiç