Daçiç: Kurti është kërcënimi më i madh për paqen në Kosovë

Në Forumin Strategjik të Bledit ku u mbajt paneli me temë: Ballkani Perëndimor, gjithçka po ndryshon, por gjithçka mbetet e njëjtë, Zëvendëskryeministri i parë dhe ministri i Punëve të Jashtme i Serbisë Ivica Daçiç tha se kryeministri i Kosovës është kërcënimi më i madh për paqen në Kosovë.

Duke komentuar deklaratën e Albin Kurtit se Prishtina muajt e fundit ka punuar në de-përshkallëzimin e konfliktit, Daçic tha se përshkallëzimi po bëhet gjithnjë e më i madh.

Ai theksoi se kanë kaluar dhjetë vjet që kur nënshkroi Marrëveshjen e Brukselit me Catherine Ashton dhe Hashim Thaçin dhe se në Prishtinë “nuk e panë të arsyeshme” të zbatojnë asgjë nga ajo marrëveshje që ka të bëjë me të drejtat e popullit serb në Kosovë, si p.sh. formimi i Bashkësisë së Komunave Serbe.

Daçic gjithashtu kujtoi se kur është biseduar për Marrëveshjen e Brukselit është biseduar për tentativën për normalizimin e marrëdhënieve ndërmjet Beogradit dhe Prishtinës pa e prekur fare çështjen e statusit të Kosovës.