Rrugaç e përdorues droge/ Blushi shpërthen ndaj Valterit: Kam bërë kallëzim në polici…

“Rrugaç e përdorues droge”, këto janë fjalët me të cilat Sekretari i Përgjithshëm i Partisë së Lirisë, Tedi Blushi i është referuar ish-deputetit Halit Valteri.

Në studion e emisionit “Opinion” në Tv Klan, Blushi ka theksuar se Halit Valteri është një ish-deputet i cili ka ndërruar pesë parti, duke mos lënë pa përmendur edhe faktin që sipas tij priste në rradhë edhe për një foto me ish-Presidentin Meta. Ai tha se Valteri e ka pranuar se është paguar për t’u larguar nga PD.

Merin Maçi: Sa i takon kallëzimeve që u shkrinë në një procedim kanë qenë dy kallëzime të vitit 2022, dhe një kallëzim i vitit 2019, por në total SPAK thotë se janë 15 kallëzime drejtuar zotit Meta dhe zonjës Kryemadhi.

Blendi Fevziu: Kush janë kallëzuesit?

Merin Maçi: Kallëzuesit janë në 2019 avokati që përmendi edhe Klodi, ndërkohë që në vitin 2022 Halit Valteri…

Tedi Blushi: Kush është Halit Valteri? Përdorues droge. Kam bërë unë kallëzim në polici, dhe e ftoj të bëjë testin e drogës. Është ky individ që ka ndryshuar pesë parti dhe publikisht në një mbledhje që kemi pasur me Këshillin Bashkiak në një trajnim në Vlorë ka deklaruar, kam 10 dëshmitarë, që jam paguar 500 mijë Euro nga Erion Veliaj.

Klodiana Lala: E keni denoncuar Blush?

Tedi Blushi: Ku ta denoncoj. Unë e ftoj Prokurorinë që të fillojë hetimet. Në një trajnim ky djalë është pyetur ore si ka mundësi që ke ndërruar 5 parti se dhe foton me Ilir Metën ja kam bërë unë këtij rrugaçi se mbante rradhë aty në shi që të bënte një foto me Ilir Metën dhe ky ka deklaruar në praninë e të paktën 10 apo 12 personave që jam paguar 500 mijë Euro për të ikur nga PD dhe për të shkuar tek Erion Veliaj. Pra këta janë kallëzuesit e rremë dhe të dënuar me vendim gjykate që ngrenë këto akuza të pambështetura as në fakte.

Kujtojmë se ka qenë ish-deputeti Halit Valteri i cili ka bërë kallëzimin në Prokurorinë e Posaçme kundër Korrupsionit dhe Krimit të Organizuar, ndaj ish-presidentit Ilir Meta dhe deputetes Monika Kryemadhi për lobim në SHBA.