“Hapeni derën, pse dele jemi ne”/ Mes tensioneve, shoferët e autobusave kërkojnë takim me kryetaren e Këshillit Bashkiak

Mbledhja e Këshillit Bashkiak të Vlorës, është shoqëruar me tensione, për shkak të protestës që kanë zhvilluar shoferët e autobusëve të linjave urbane. Këta të fundit kanë kërkuar që të hyjnë në mbledhjen e Këshillit Bashkiak, por nuk janë lejuar nga efektivët e policisë, që ishin në derën e sallës.

“Hapni derën, pse dele jemi ne?”, janë shprehur drejtuesit e mjeteve të transportit të qytetarëve.

Përveç konkurrencës nga furgonat e palicencuar, një kërkesë tjetër është moslargimi nga vendi ku ata qëndronin përherë.

Sipas tyre, stacioni do të jetë tashmë në afërsi të institucionit të paraburgimit, gjë që bën që udhëtarët të mos vijnë dot për shkak të largësisë.

Kryetari i shoqatës së udhëtarëve të transportit urban ndër qytetas Shpëtik Vrioni thotë se janë sot në dyert e këshillit bashkiak për arsyen se ky këshill merr vendimin e ndryshimit të terminalit të autobusëve. Vrioni thotë se kërkojnë takim me kryetaren e këshillit që ky vendim mos të aprovohet. Zhvendosja e terminalit drejt hyrjes së qytetit sipas tij dëmton 50 familje, për shkak se sipas tij nuk i vijnë klientet.